Il-Bank of Valletta appoġġa l-konservazzjoni ta’ tmien dokumenti storiċi li nstabu fl-Arkivji Notarili fi Triq San Kristofru, il-Belt, fl-Uffiċċju tan-Nutar tal-Gvern. Dan il-proġett ta’ konservazzjoni kien immexxi mill-Fondazzjoni Arkivjali Nutarili (NAF) taħt l-‘Adoption Scheme’ tagħha, li tinkoraġġixxi istituzzjonijiet, kumpaniji u individwi biex jisponsorjaw il-konservazzjoni ta’ dokumenti nutarili. Wieħed minn dawn id-dokumenti ‘adottati’ huwa l-att oriġinali tal-formazzjoni tal-Anglo-Maltese Bank fl-1810. L-Anglo Maltese Bank kien wieħed minn erba’ banek li ngħaqdu fil-Bank Nazzjonali ta’ Malta, il-predeċessur tal-Bank of Valletta.
Il-Fondazzjoni Arkivjali Notarili hija organizzazzjoni volontarja li tfittex finanzjament biex tippreserva u tipproteġi l-kollezzjoni rikka ta’ dokumenti nutarili b’mod professjonali, effiċjenti u aċċessibbli għall-ġenerazzjonijiet futuri ta’ riċerkaturi. Il-konservazzjoni tal-istrumenti finanzjarji ‘adottati’ mill-Bank of Valletta saret mill-konservaturi tal-karti kwalifikati min-NAF, taħt is-superviżjoni ta’ Dr Theresa Zammit Lupi. Id-dokumenti għaddew minn trattament li kien jinkludi tindif tal-wiċċ, tiswijiet tal-karta u tal-għata, u ġew irranġati deformazzjonijiet, fost oħrajn.
Dr Joan Abela, Konsulent Storiku għall-Arkivji Notarili, u Dr Keith German, In-Nutar Prinċipali tal-Gvern wrew is-sett ta’ dokumenti kkonservati permezz tal-appoġġ tal-Bank, lid-direttur tal-BOV Dr Diane Bugeja u Charles Azzopardi, Eżekuttiv tal-PR u Marketing tal-BOV .
Dr Abela qal li ironikament dawn id-dokumenti baqgħu ħajjin billi ġew minsija, għax probabbilment kienu jintremew kieku kienu maħżuna f’post li kien jintuża regolarment. Minn mindu tnediet l-iskema ‘Addotta Nutar’ fl-2013, din kienet l-ewwel darba li rċevejna appoġġ speċifikament għall-preservazzjoni ta’ strumenti finanzjarji. Huwa ttamat li aktar organizzazzjonijiet isegwu l-eżempju tal-BOV peress li x-xogħol tal-Fondazzjoni jiddependi fuq donazzjonijiet bħal dawn.
‘L-Arkivji Nutarili huma litteralment ‘il fuq minn 20,000 ħarsa lejn l-aħħar sitt sekli tagħna miġbura f’post wieħed,’ qal Dr German. ‘L-iktar avvenimenti sinifikanti fl-istorja ta’ Malta huma dokumentati hawn u huwa d-dmir tagħna li nippreservawhom għall-posterità. Din il-kollezzjoni ta’ dokumenti finanzjarji kkonservati bl-għajnuna tal-Bank of Valletta tgħin biex l-Arkivji Notarili jsiru aktar aċċessibbli għal studenti, studjużi, storiċi u riċerkaturi.’
‘Huwa tassew unur li hawn quddiemna hawn id-dokument li bażikament huwa l-pedament tal-Bank of Valletta,’ qalet Dr Bugeja. ‘Bħala Bank b’aktar minn 200 sena ta’ storja, napprezzaw ix-xogħol siewi mwettaq mill-Arkivji Notarili u kien tassew il-pjaċir tagħna li nipparteċipaw fi proġett li se jkompli jiżgura li l-wirt kulturali rikk ta’ Malta jkompli jkun mgawdi mill-ġenerazzjonijiet futuri. ‘
