Bħala parti miċ-ċelebrazzjonijiet tal-Ġimgħa Ddedikata għall-Esperjenza tal-Kljient, il-Bank of Valletta organizza l-ewwel Konferenza dwar din it-tema f’Malta, avveniment organizzat esklussivament għall-impjegati tal-BOV.
Din il-konferenza ġabret flimkien kelliema ewlenin internazzjonali u innovaturi, kif ukoll esperti dwar l-esperjenza tal-klijenti minn ġewwa l-Bank biex jaqsmu flimkien strateġiji u ħsibijiet iffukati fuq it-titjib tar-relazzjonijiet tax-xogħol fit-tul mal-klijenti.
Il-fatt li din il-konferenza kienet indirizzata b’mod esklussiv għall-impjegati tal-BOV, tirrifletti l-importanza li l-Bank jagħti lill-esperjenza tal-klijent. Il-konferenza enfasizzat l-investiment sinifikanti li l-Bank qed jagħmel fin-nies tiegħu biex jiżgura li dawn ikunu f’pożizzjoni li joffru l-ogħla livell ta’ servizz lill-klijenti kollha tiegħu, ikun x’ikun il-punt ta’ kuntatt li jgħażlu.
Kif spjega l-Kap Eżekuttiv tal-Bank, Kenneth Farrugia, waqt id-diskors tal-ftuħ tiegħu, “Il-Bank of Valletta huwa mpenjat li jrawwem kultura li tpoġġi l-esperjenza tal-klijent fuq quddiem nett f’kull livell tal-organizzazzjoni.
L-għarfien u l-istrateġiji li se jiġu kondiviżi matul il-konferenza se jsawru l-isforzi futuri tagħna marbuta mat-titjib tal-esperjenza tal-klijent, u jagħmlu dan element importanti li jiddistingwina. Aħna ninsabu ħerqanin li nieħdu l-lezzjonijiet kollha li tgħallimna, u nibnu fuqhom biex nipprovdu lill-klijenti tagħna, esperjenza bla paragun.”
L-avveniment kien jinkludi numru ta’ kelliema prominenti, fosthom Betul Yilmaz, Managing Partner ta’ Elephant & CX Consultant li enfasizzat il-prinċipji ewlenin ta’ empatija, proattività, u personalizzazzjoni fl-esperjenza tal-klijent.
Il-Professur Georgios Yannakakis u Dr Ahmed Khalifa mill-Istitut tal-Logħob Diġitali fl-Università ta’ Malta wrew kif l-innovazzjonijiet fl-Intelliġenza Artifiċjali u l-immudellar tal-UX mill-industrija tal-logħob tal-vidjow jistgħu jiġu applikati għall-banek biex joħolqu esperjenzi personalizzati u jsaħħu l-involviment tal-klijent.
Kien hemm ukoll diskussjoni li rat numru ta’ esperti fl-industrija bħal Benji Borg, Kap Eżekuttiv ta’ 9H Digital, Christabelle Camilleri, Kap Eżekuttiv u ko-fundatriċi ta’ Health & Co & Lil’Ville Childcare, u Theodoros Papadopoulos, Acting Chief CX Officer fil-BOV. Il-kelliema esploraw kif it-teknoloġija u l-Intelliġenza Artifiċjali jistgħu jappoġġaw il-kultura ta’ organizzazzjoni ffukata fuq il-klijent.
Huma enfasizzaw ukoll l-importanza li jinżamm approċċ iffukat fuq il-klijent fl-iżvilupp tal-prodott u tkellmu dwar strateġiji biex jingħelbu sfidi fil-bini ta kultura li tindirizza l-klijent.
Mument speċjali tal-konferenza kien il-preżentazzjoni ta’ premijiet lill-impjegati tal-BOV li kienu eżempju ħaj ta’ kif iżżomm il-klijent priorità fl-imġiba tagħhom, matul is-sena li għaddiet. Dawn l-individwi kienu sors ta ispirazzjoni għall-impjegati kollha.
L-Ewwel Pass għal BOV u għal Malta
Dan l-avveniment immarka kapitlu ġdid għall-BOV, u kompla jpoġġi l-Bank fuq quddiem tas-suq. Kif stqarr Theodoros Papadopoulos fl-indirizz tal-għeluq tiegħu, “Meta ninvestu fin-nies tagħna, inkunu qed nagħtuhom l-għodda u l-għarfien biex niżguraw li l-klijenti tagħna dejjem jirċievu s-servizz li jkunu qed jistennew minn bank bħall-Bank of Valletta. Din il-konferenza tirrappreżenta pass sinifikanti biex tgħolli l-esperjenza tal-klijent kemm madwar il-Bank, kif ukoll madwar il-komunità kummerċjali Maltija.”
Ġimgħa Ddedikata għall-Esperjenza tal-Klijent 2024
Minbarra l-konferenza, it-Tim tal-Esperjenza tal-Klijent (CX) tal-Bank qed jorganizza sensiela ta’ attivitajiet din il-ġimgħa bil-għan li jrawwem mentalità ffukata fuq il-klijent madwar il-Bank. Punt ewlieni huwa l-avveniment annwali tal-Frontline Experience, fejn l-impjegati tal-back-office jingħataw l-opportunità li jesperjenzaw b’mod dirett f’operat ta’ frontline.
Din l-inizjattiva tipprovdi approċċ prattiku biex wieħed jifhem aħjar il-vjaġġ tal-klijent, inklużi l-isfidi u l-opportunitajiet li jħabbtu wiċċhom magħhom l-impjegati li jaqdu l-klijent b’mod dirett, biex b’hekk jaslu għal impenn aktar profond biex tittejjeb l-esperjenza ġenerali tal-klijent.
