Rapporti mill-Brażil qed isostnu li l-FA Brażiljan qed tikkunsidra l-possibbiltá li tagħti l-inkarigu tat-team nazzjonali lil Carlo Ancelotti wara li ftit tal-jiem ilu Tite ħabbar li rriżenja wara t-telfa tal-kwarti-finali tat-Tazza tad-Dinja kontra l-Kroazja.
Ancelotti, 63 sena, kien ġie avviċinat informalment f’Ottubru li għadda.
Min-naħa tiegħu, qed jingħad li Ancelotti huwa miftuħ li jieħu t-tmexxija tat-team nazzjonali … iżda fi tmiem l-istaġun minħabba li jrid ikompli bil-proġett tiegħu ma’ Real Madrid.
Dan ikun ifisser li l-ħames darbiet champions tad-Dinja jkollhom jaħtru coach temporanju sa Ġunju li ġej.
Il-coach Taljan jinsab taħt kuntratt ma’ Real Madrid sa tmiem l-istaġun li ġej, jiġifieri, il-Brażil ikollhom jinnegozjaw mal-club Spanjol minħabba li jkun fadallu sena kuntratt.
Ancelotti bħalissa jaħdem mat-trio ta’ players Brażiljani, Vinicius Jr, Eder Militao u Rodrygo, fil-Bernabeu.
Għażliet oħra jinkludu lill-coach ta’ Fluminense, Fernando Diniz, li għandu l-appoġġ ta’ numru ta’ players fosthom Dani Alves, Thiago Silva, Bruno Guimaraes, Antony u Neymar.
Pep Guardiola huwa rrappurtat ukoll li jinsab fil-lista mqassra biex jieħu post Tite.
Iżda l-coach Spanjol għadu kif ġedded il-kuntratt tiegħu ma’ Manchester City.
