“Il-Gvern iħares lejkom bħala l-mutur ewlieni li permezz tiegħu dan il-pajjiż jista’ jkompli jinbidel u jirriforma ruħu għall-aħjar.” Dan kien il-messaġġ ewlieni tal-Prim Ministru Robert Abela waqt sessjoni oħra tal-Youth Advisory Forum fejn għaqdiet oħra taż-żgħażagħ kienu rappreżentati minn żgħażagħ li tkellmu fil-laqgħa li ddiskutiet il-Budget.
Fi tmiem diskussjoni oħra wara li sema’ liż-żgħażagħ f’Kastilja, il-Prim Ministru sostna l-importanza tal-involviment taż-żgħażagħ bħala xprun għal perspettivi oġġettivi u ideat friski. Dan aktar u aktar hekk kif illum il-Gvern jinsab f’pożizzjoni li jimbotta politika li tagħti prijorità lill-kwalità fuq il-kwantità.
Hawnhekk il-Prim Ministru rrimarka numru ta’ temi li huma kruċjali għall-ħajja ta’ kuljum ta’ kwalità għall-poplu Malti Għawdxi, fi sfond ta’ aktar deċiżjonijiet li jiżguraw tkabbir ekonomiku sostenibbli u investiment ta’ valur miżjud f’pajjiżna.
Ewlenin fost dawn it-temi kien hemm dak tal-ambjent, hekk kif Dr Abela saħaq li Gvern immexxi minnu se jibqa’ jagħti prijorità lill-ambjent u l-ħolqien ta’ spazji pubbliċi. “Sħaqt u insistejt li entitajiet bħal Project Green u d-Dipartiment għax-Xogħlijiet Pubbliċi jaħdmu dejjem aktar qrib ta’ xulxin. Biex f’kull proġett li nagħmlu nippromwovu s-sostenibbiltà,” sostna l-Prim Ministru.
Dr Abela indirizza wkoll suġġetti li ngħataw prominenza fil-Budget għas-sena d-dieħla fosthom is-saħħa mentali. Fil-fatt, il-Prim Ministru qal, “M’aħniex se nistrieħu qabel naraw il-kundizzjonijiet u l-mard relatati mal-moħħ trattati l-istess bħal mard ieħor. Proprju minħabba din ir-raġuni li ħabbarna miżuri konkreti kif se ngħinu lin-nies jidentifikaw aħjar u minn kmieni kemm jista’ jkun problemi ta’ saħħa mentali. Se nqarrbu s-servizzi tas-saħħa mentali qrib ħafna tan-nies, fil-lokalitajiet, flimkien mal-Kunsilli Lokali.”
Dwar il-qasam sportiv, il-Prim Ministru sostna kif hawn ukoll il-Gvern ra li jdaħħal il-miżura ta’ membership f’gym għal dawk li għandhom bejn 18 u 20 sena bħala messaġġ li l-attività fiżika hija l-qofol ta’ ħajja b’saħħitha u li jixirqilha l-importanza li tistħoqqilha fil-lista ta’ prijoritajiet tal-pajjiż.
“Irridu nibdewha minn qabel dak li jkun għalaq tmintax-il sena. Bdejna proġett pilota u sa sentejn oħra rridu naraw il-kulleġġi kollha attivi – biex l-istudenti tagħna jkollhom attività fiżika kuljum,” irrimarka l-Prim Ministru hekk kif semma wkoll miżuri li jimbuttaw bidla fil-kultura, fosthom għal aktar qari.
Il-Prim Ministru temm jgħid li filwaqt li jħares ’il quddiem biex fil-futur jara liż-żgħażagħ mal-mejda tad-deċiżjonijiet sadanittant dan il-Gvern se jkompli jistinka biex ikollna ekonomija u soċjetà stabbli u soda.
