Il-coach Taljan, Enzo Potenza, se jmexxi lit-team ta’ Sta Lucia sa tmiem l-istaġun wara li l-club temm ħesrem il-kuntratt ta’ Pablo Sanchez Cortez hekk kif it-team jinsab fuq iż-żona tal-ħamra u jinsab fil-periklu li jitlef il-profil tiegħu fl-ogħla diviżjoni … meta minn disa’ logħbiet rebaħ waħda, kiseb żewġ draws u tilef sitt partiti.
Potenza żgur li ma għandu bżonn tal-ebda introduzzjoni hekk kif ikkowċja tliet timijiet Maltin.
Huwa ddebutta ma’ Senglea Athletic fil-21 ta’ Settembru, 2018, fid-draw ta’ 1-1 kontra Pietá Hotspurs.
Imbagħad, fl-istaġun ta’ wara mexxa lit-team ta’ Floriana għar-rebħ tal-Kampjonat Premier. Huwa rriżenja mill-kariga f’Diċembru 2020 iżda fi Frar 2021 reġa’ ngħata l-inkarigu li dam biss tliet partiti.
Fl-istaġun 2021-22 mexxa lil Marsa fiċ-Challenge League li wassalhom sar-raba’ post fi Grupp B.
