Il-familja tal-mibki Gianluca Vialli nhar l-Erbgħa attendiet għal ċerimonja speċjali fil-Belt tal-Vatikan, fejn iltaqgħet mal-Papa Franġisku u rċeviet rigal speċjali.
L-eks attakkant ta’ Sampdoria, Juventus u Chelsea, miet traġikament fl-età ta’ 58 ix-xahar li għadda wara battalja twila mal-kanċer fil-frixa, li fl-aħħar mill-aħħar ġiegħlu joħroġ mill-irwol tiegħu mal-Italja ta’ Roberto Mancini. Vialli kien parti importanti mill-istaff matul il-mixja tal-Azzurri għall-Euro 2020 u kien figura apprezzata ħafna.
Kif irrappurtat minn Vatican News, mart Vialli, Cathryn White Cooper, u ż-żewġt ibniet tiegħu, Olivia u Sofia, kif ukoll ħutu, attendew għal ċerimonja speċjali mal-Papa Franġisku.
Huma ngħataw flokk tal-Italja, li jġib l-isem ta’ Francesco, f’ċerimonja li għaliha attenda wkoll il-ħabib qrib tiegħu, il-coach nazzjonali Taljan, Roberto Mancini, li lagħbu għal bosta snin flimkien ma’ Sampdoria.
Ulied Vialli, riedu jiltaqgħu mal-Papa biex jaqsmu l-akbar xewqa tal-eks attakkant fl-aħħar perjodu ta’ ħajtu, dik li jakkumpanja lit-tfal tiegħu fuq l-artal. Traġikament, Vialli u White Cooper kienu se jiċċelebraw l-20 anniversarju taż-żwieġ tagħhom din is-sena.
