Fi sforz kontinwu biex itejjeb l-esperjeza tal-klijenti mill-Fergħat tiegħu, Bank of Valletta nieda premju, immirat biex jinċentiva lill-impjegati jkomplu jagħmlu l-almu tagħhom biex joffru l-aqwa servizz possibbli lill-klijenti ta’ kuljum.
Għall-ewwel tliet xhur tas-sena 2022, it-tim tal-Fergħa ta’ Ħaż-Żebbuġ kien iddikjarat rebbieħ tal-ewwel premju. Dan kien possibbli biss wara li saret analiżi dettaljata tar-riżultati dwar l-Esperjenza tal-Klijent madwar in-netwerk kollha ta’ fergħat tal-Bank.
Hemm sitt metriċi ewlenin li jitqiesu biex ikun dikjarat ir-rebbieħ. Dawn il-metriċi jinġabru minn stħarriġ li jindirizza l-esperjenza tal-klijenti, liema stħarriġ isir fuq bażi regolari mal-klijenti tal-Bank. Fost il-kriterji li jiġu kkunsidrati, wieħed jista’ jsemmi l-livell ġenerali ta’ sodisfazzjon tal-klijenti, il-kwalità ta’ informazzjoni li tingħatalhom kif ukoll il-livell ta’ privatezza xierqa li jingħataw waqt li jkunu qed jirċievu servizz.
Kenneth Farrugia, Chief Retail Network Officer u Geoffrey Ghigo, Head Retail Network esprimew is-sodisfazzjon tagħhom għall-prestazzjoni tal-fergħat kollha waqt attività soċjali li ġiet organizza għall-membri tat-tim rebbieħ. Is-Sur Farrugia qal li l-Bank huwa impenjat bis-sħiħ li jsaħħaħ l-esperjenza tal-klijent, filwaqt li jagħraf li dan huwa fattur ewlieni li jagħmel id-differenza f’ambjent li kulma jmur isir aktar kompetittiv.
“Dan il-Premju kien imniedi biex jenfasizza l-importanza li l-Bank jagħti lill-esperjenza tal-klijent u juri r-rikonoxximent tiegħu lil dawk it-touchpoints tas-servizz li jeċċellaw f’dan ir-rigward,” spjega s-Sur Farrugia. “Il-Bank nieda diversi inizzjattivi oħra, li uħud minnhom għadhom qed jiġu żviluppati, waqt li oħrajn dalwaqt ikunu lesti. Dawn l-inizzjattivi ser iħallu impatt sinifikanti fuq l-esperjenza tas-servizz tal-klijenti tagħna.”
Geoffrey Ghigo spjega li, “timijiet li jiltaqgħu wiċċ ’imb wiċċ mal-klijent ħabbtu wiċċhom ma’ sfidi iebsin matul it-18-il xahar li għadda minħabba l-pandemija tal-COVID 19. M’hemmx dubbju li l-bidu tal-pandemija kellu impatt qawwi fuq kemm stajna naqdu l-klijenti tagħhna b’mod normali. Is-servizz tagħna kien immexxi mill-protokolli relatati mas-saħħa li kienu intiżi biex iħarsu l-interessi kemm tal-klijienti kif ukoll tal-impjegati.” Bir-rilaxx kważi totali tal-miżuri, il-Bank jibqa’ ffukat biex jilħaq l-aspettattivi tal-klijenti tiegħu.
Josephine Scerri, il-Maniġer tal-Fergħa ta’ Ħaż-Żebbuġ esprimiet is-sodisfazzjon tagħha għar-riżultat miksub flimkien mat-tim tagħha. Is-Sa Scerri rrikonoxxiet li l-kollegi tagħha stinkaw ħafna fi żminijiet li offrew sfida. Madankollu, huma dejjem poġġew l-interess tal-klijent fuq nett tal-aġenda tagħhom. Ir-riżultat miksub jkompli jinkoraġġixxi t-tim biex jibqa’ jaħdem fl-aħjar interess tal-Bank u tal-klijenti tiegħu.
