Il-FIFA, flimkien mal-Bord Internazzjonali, l-organizzazzjoni inkarigata mir-regoli tal-fooball, qed jistudjaw il-possibbiltá li jinbidlu r-regoli fl-għoti tal-penalties fit-tentattiv li l-goalkeepers ma jkollhomx aktar kuntatt mal-players li jkunu se jixxuttjaw mill-11-il metru biex itellfulhom il-konċentrazzjoni.
Din l-inizjattiva qed tittieħed wara l-atti kontroversjali tal-goalkeeper tal-Arġentina, Emi Martinez, fit-Tazza tad-Dinja tal-Qatar 2022.
Fil-finali kontra Franza, Martinez irrikorra għal modi differenti biex l-avversarji tiegħu jitilfu l-konċentrazzjoni u jġibhom nervużi qabel jixxuttjaw il-penalty tagħhom …. Aurelien Tchouameni falla mill-11-il metru.
Barra minn hekk, ħafna mill-goalkeepers iġibu ruħhom b’dan il-mod biex ifixklu lill-players avversarji b’mod psikoloġiku.
Għaldaqstant il-federazzjoni mondjali qed tikkunsidra li li tieħu l-miżuri neċessarji biex tevita li l-goalkeepers ikollhom kuntatt ma’ dawk il-players li jkunu se jagħtu l-penalties.
Il-goalkeeper irid jieħu postu mill-ewwel bejn il-lasti biex jipprova jilqa’ l-penalty u r-referee biss għandu jkollu kuntatt jew mal-istess goalkeeper jew inkella mal-player avversarju.
