Il-Futsal Malta Association (FMA) laqgħet b’sodisfazzjon kbir id-deċiżjoni tal-Malta Football Association li tinkludi Arena tal-Futsal ġdida fil-Masterplan tar-Riġenerazzjoni tal-Istadium Nazzjonali, pass li jagħlaq moviment twil u bla heda li beda fl-2012 biex il-futsal Malti jkollu infrastruttura ddedikata.
Sa mit-twaqqif tagħha fl-2011, l-FMA ħadmet kontinwament mal-awtoritajiet u mal-MFA biex tindirizza n-nuqqas ta’ faċilitajiet, hekk kif il-ftit courts indoor disponibbli kienu kważi dejjem okkupati. L-ewwel diskussjonijiet dwar infrastruttura ddedikata bdew snin ilu ma’ amministrazzjonijiet preċedenti, u tul is-snin ġew ippreżentati diversi proposti konkreti, inklużi pjanijiet dettaljati b’disinni u stimi ta’ spejjeż. Minkejja li dawn ma ġewx implimentati minħabba diversi sfidi, il-ħidma u l-insistenza tal-FMA qatt ma waqfu.
Dawn l-isforzi sostnuti wasslu biex iż-żewġ partiti politiċi ewlenin jinkludu l-impenn li tinbena Arena tal-Futsal fil-manifesti elettorali tagħhom tal-2022. Illum, permezz tal-viżjoni tal-MFA li tirriġenera l-Istadium Nazzjonali, ħarġet opportunità konkreta biex dan il-faċilità tal-futsal jiġi integrat fil-kumpless il-ġdid tal-istadium, u b’hekk tissaħħaħ is-sinerġija bejn il-futbol u l-futsal.
Il-National Stadium Regeneration Committee, immexxi mill-Viċi President tal-MFA Dr Matthew Paris, ippreżenta brief ċar li jinkludi l-Arena tal-Futsal bħala wieħed mid-deliverables ewlenin. Il-President tal-FMA Mark Borg huwa wkoll parti minn dan il-kumitat u mit-tim tal-masterplanning u d-disinn, li qed jaħdem biex din il-viżjoni ssir realtà.