L-Assoċjazzjoni tal-Lukandi u r-Ristoranti f’Malta tħares b’ottimiżmu biex pajjiżna jirritorna għan-normalità
Miktub Minn Carmen Cachia
Il-ftuħ tar-ristoranti f’Malta u Għawdex fi tmiem il-ġimgħa l-oħra kien wieħed mill-miżuri mħabbra mill-Prim Ministru Robert Abela li bihom pajjiżna pass pass qiegħed jerġa’ jibda jħaddem il-mutur tal-ekonomija b’mod sensibbli u sigur fid-dawl taċ-ċirkostanzi li ninsabu fihom minħabba l-pandemija globali tal-Covid-19. Inewsmalta tkellmet ma’ Tony Zahra, President tal-Assoċjazzjoni tal-Lukandi u Ristoranti (MHRA) fejn qalilna li l-ftuħ tar-ristoranti kien ta’ suċċess akbar minn dak mistenni u li huma jinsabu ħerqana biex pajjiżna jerġa’ jirritorna għan-normalità.
“Dawk ir-ristoranti li kellimna fl-inħawi ta’ Tas-Sliema u ta’ San Ġiljan qalulna li marru aħjar milli stennew. Ir-ristoranti fil-Belt Valletta b’mod ġenerali kienu kwieti u dan minħabba li ma kienx hemm turisti. Il-Maltin imorru fil-belt kapitali l-aktar fi tmiem il-ġimgħa,” spjega Zahra.
L-MHRA qalet li f’inħawi oħra kien hemm andamenti mħallta iżda Għawdex irrapporta negozju tajjeb ħafna minħabba li kien tmiem il-ġimgħa u ħafna Maltin erħewlha lejn din il-gżira ġara.
“L-Assoċjazzjoni tagħna hija ħerqana biex jerġa’ jiftaħ l-ajruport bi protokolli ta’ sigurtà fl-arrivals. Dan bil-għan li din l-industrija kbira terġa’ tqum fuq saqajha fejn tipprovdi eluf ta’ impjiegi u ddaħħal mijiet ta’ miljuni ta’ ewros f’taxxi lill-Gvern,” temm Tony Zahra.
