Minn Cristian Muscat
Kif bdiet l-imħabba tiegħek lejn il-futbol?
L-imħabba tiegħi lejn il-futbol bdiet minn età żgħira ħafna. Dejjem kont inħoss passjoni għal din il-logħba u kont inħobb inqatta’ sigħat nilgħab mal-ħbieb, sakemm eventwalment sirt parti minn tim organizzat. Il-futbol dejjem kien parti importanti minn ħajti.
Iddeskrivi l-esperjenza preżenti tiegħek ma’ Santa Venera Lightnings FC.
L-esperjenza tiegħi ma’ Santa Venera Lightnings FC hija waħda pożittiva ħafna. Hemm ambjent familjari u professjonali, fejn kull plejer iħossu apprezzat u motivat. Il-klabb qed jagħtini l-opportunità nikber kemm bħala plejer kif ukoll bħala persuna.
X’tikkummenta fuq l-andament tat-tim matul l-istaġun li għadda?
L-istaġun li għadda kien wieħed ta’ sfidi imma wkoll ta’ tkabbir. Kull logħba ġabet magħha tagħlim u esperjenza ġdida.
Kif qed tħarsu lejn l-istaġun li ġej?
Qegħdin nħarsu lejn l-istaġun li ġej b’ħafna tama u ambizzjoni. It-tim qed jaħdem iebes fit-taħriġ u kulħadd determinat li jtejjeb fuq l-esperjenza tas-sena li għaddiet. Nemmen li se nkunu ferm aktar kompetittivi.
X’tikkummenta fuq il-kowċ, Jamie Pace?
Jamie Pace huwa kowċ eċċellenti u motivatur kbir. Huwa għandu esperjenza vasta fil-futbol u jaf kif jagħti direzzjoni ċara u pożittiva lill-plejers. Grazzi għalih, it-tim għandu viżjoni ċara u mentalità rebbieħa.
X’tikkummenta fuq il-livell tal-futbol Malti fil-preżent?
Il-livell tal-futbol Malti qiegħed dejjem jitjieb. Hemm aktar professjonalità, aktar żgħażagħ ta’ talent, u investiment kontinwu fit-taħriġ u l-iżvilupp. Dan kollu jagħti futur sabiħ għall-futbol fil-pajjiżna.
U dak tar-riżorsi (grawnds) fejn titħarrġu u tilagħbu l-logħob kompetittiv tagħkom?
Ir-riżorsi li għandna huma ta’ livell tajjeb u qed jgħinuna ħafna fit-taħriġ tagħna. L-infrastruttura qiegħda dejjem tiġi mtejba, u dan jagħmilha possibbli li nkunu nistgħu nitħarrġu f’ambjent ta’ kwalità li jgħin biex jiżviluppaw il-plejers.
Għaddi messaġġ finali lil min jixtieq jagħmel karriera ta’ suċċess fil-futbol.
Il-parir tiegħi hu li qatt ma taqta’ qalbek u dejjem taħdem iebes. Il-futbol jitlob dixxiplina, passjoni u dedikazzjoni. Jekk temmen fik innifsek u tagħti l-aħjar tiegħek, tista’ tilħaq il-miri tiegħek. L-iktar ħaġa importanti hi li tgawdi kull mument fil-grawnd!