Minn Cristian Muscat
Kif bdiet l-imħabba tiegħek lejn il-ġinnastika ritmika?
Bdejt nipprattika l-isport sabiħ tal-ġinnastika ritmika meta kelli erba’ snin. Wara li ddedikajt għaxar snin għat-taħriġ u l-kompetizzjoni, irrealizzajt sa meta kelli 14-il sena li dan l-isport kien aktar minn sempliċi passatemp – kien il-passjoni tiegħi. Meta l-karriera tiegħi bħala ġinnasta ntemmet, kont naf li ma ridtx inħalli l-isport warajja. Bdejt nikkowċja fil-klabb lokali tiegħi waqt li kont qed insegwi lawrja universitarja fil-Ġinnastika Ritmika.
Iddeskrivi r-rwol tiegħek bħala waħda mill-aqwa kowċis tal-ġinnastika f’pajjiżna u wkoll bħala Direttur tar-Ritmica Gymnastics Club.
Meta waqqaft ir-Ritmica Club f’Malta, sar l-ewwel klabb tal-ġinnastika ritmika fil-pajjiż li offra lezzjonijiet immexxija minn kowċis kwalifikati u li ġab atleti barra minn Malta għal kompetizzjonijiet internazzjonali. Ftit snin wara, b’kollaborazzjoni ma’ klabb lokali ieħor, organizzajna l-ewwel Kompetizzjoni Internazzjonali tal-Ġinnastika Ritmika f’Malta. Minn dakinhar, ġinnasti li tħarrġu f’Ritmica, komplew isiru kowċis huma stess.
Il-ġinnastika ritmika issa tinsab fi stadju dinamiku ta’ żvilupp f’Malta. Aktar klabbs qed jippromwovu b’mod attiv l-isport, u joffru lill-atleti żgħażagħ iċ-ċans li jesploraw is-sbuħija u d-dixxiplina tiegħu. Dejjem aktar, il-ġinnasti qed jaraw l-isport mhux biss bħala passatemp iżda bħala karriera potenzjali. Xi wħud għażlu li jkomplu l-edukazzjoni tagħhom fl-Iskola Nazzjonali tal-Isport (NSS), bl-aspirazzjonijiet li jkomplu bl-istudji tagħhom.
Din is-sena, ilħaqna pass importanti ieħor: il-klabb tagħna issa għandu tliet ‘judges’ kwalifikati internazzjonalment, li huma wkoll kowċis professjonali u dedikati. Jien tassew onorata li jien l-ewwel ‘judge’ tal-Ġinnastika Ritmika ċċertifikat mill-FIG li jirrappreżenta lil Malta.
F’Ritmica Club, aħna kburin li appoġġjajna l-iżvilupp tal-aqwa ġinnasti ta’ Malta, billi għennihom jilħqu livelli ġodda ta’ prestazzjoni u jirrappreżentaw lin-nazzjon b’kburija f’kompetizzjonijiet internazzjonali uffiċjali. It-tim tagħna jaħdem b’passjoni u dedikazzjoni, u jiggwida lill-ġinnasti f’kull stadju tal-iżvilupp tagħhom.
X’inhu s-sigriet tas-suċċess tal-ġinnasti tiegħek, fosthom dak ta’ Lauren Agius u Alyona Draguzya?
Fl-2025, tnejn mill-aqwa atleti junior tagħna, Lauren Agius u Alyona Draguzya, irriżultaw bħala l-aqwa ġinnasti ritmiċi ta’ Malta. Huma rrappreżentaw lill-pajjiż f’diversi kompetizzjonijiet internazzjonali, u wrew il-livell kompetittiv tagħhom barra minn Malta. Id-dedikazzjoni tagħhom laħqet il-qofol tagħha f’mument storiku meta l-ġinnastika ritmika ġiet inkluża għall-ewwel darba fil-Logħob tal-Pajjiżi ż-Żgħar f’Andorra.
Minkejja l-ħin limitat ta’ tħejjija u l-isfida li l-‘junior routines’ jiġu adattati għar-regolamenti tal-kbar, il-ġinnasti tagħna kellhom prestazzjoni kunfidenti. Huma kkompetew kontra ġinnasti b’esperjenza fil-Kampjonati Dinjija u Ewropej, urew reżiljenza, determinazzjoni, u grazzja. Fil-fatt, Lauren u Alyona qabżu lil xi atleti minn Andorra u Monaco.
L-impenn li jmiss tagħna huwa li nippreparaw lil Lauren u Alyona għall-kompetizzjonijiet FIG li ġejjin, kif ukoll għall-Kampjonati Ewropej u Dinjija. Dawn l-avvenimenti jimmarkaw il-kapitlu li jmiss fil-vjaġġ tagħhom u jirrappreżentaw qabża oħra ‘l quddiem għall-ġinnastika ritmika f’Malta.
Madankollu, biex jitħarrġu f’dan il-livell elite, l-atleti jeħtieġu sa 40 siegħa ta’ prattika fil-ġimgħa. Dan jagħmel l-aċċess għal faċilitajiet speċjalizzati – bħal soqfa għoljin u twapet tal-ġinnastika ritmika – essenzjali. Sfortunatament, il-limiti fid-disponibbiltà tal-faċilitajiet u l-ispejjeż finanzjarji għoljin jagħmluha diffiċli għall-klabb biex jipprovdi b’mod konsistenti l-ħin ta’ taħriġ meħtieġ.
Biex nilħqu dawn id-domandi, inħarsu ‘l quddiem għall-kollaborazzjoni u appoġġ aktar b’saħħithom mill-Federazzjoni Maltija tal-Ġinnastika. Is-sħubija tagħhom se tkun kruċjali biex tiżgura li dawn l-atleti ta’ livell ikomplu jiżviluppaw u jirnexxu fix-xena internazzjonali.
Ninsab kuntenta biż-żieda fil-kollaborazzjoni internazzjonali li qed isseħħ f’Malta. Ġinnasti minn klabbs differenti qed jieħdu sehem f’kampijiet ta’ taħriġ u kompetizzjonijiet barra minn Malta, filwaqt li kowċis u atleti barranin qed iżuru wkoll Malta biex jaqsmu l-għarfien u l-esperjenza. Dawn l-iskambji huma vitali biex jgħollu l-livell tal-isport fuq livell nazzjonali.
F’Ottubru, il-klabb tagħna se jospita kompetizzjoni internazzjonali u kamp ta’ taħriġ li fiha se tkun preżenti l-finalista tal-Olimpjadi ta’ Tokyo 2020, Viktoriia Onopriienko. Se tkun opportunità inkredibbli għall-ġinnasti Maltin biex jitgħallmu minn waħda mill-aqwa fid-dinja, jispiraw il-ġenerazzjoni li jmiss u jsaħħu aktar il-komunità lokali tal-ġinnastika tagħna.
Għaddi messaġġ finali lil kull min jixtieq jibda jipprattika l-ġinnastika ritmika.
Il-ġinnastika ritmika huwa sport uniku li jgħaqqad il-flessibbiltà, il-kordinazzjoni u r-reżistenza. Kull ‘routine’ hija espressjoni kemm tal-atletiċiżmu kif ukoll tal-arti, imwettqa mal-mużika u msaħħa mill-eleganza ta’ leotards magħmulin b’mod sabiħ. Huwa sport li jeħtieġ kemm qalb kif ukoll dixxiplina – li joffri esperjenzi indimentikabbli u tkabbir personali.
Għal kull tifla li titla’ fuq it-tapit, il-ġinnastika ritmika tipprovdi mhux biss lezzjonijiet siewja tal-ħajja iżda wkoll memorji li jdumu tul ħajjitha kollha. Minn kampijiet ta’ taħriġ u kompetizzjonijiet għal ħbiberiji u kisbiet personali, dan l-isport joffri vjaġġ li huwa kemm sabiħ kif ukoll sodisfaċenti!