Minn MELVIN FARRUGIA
Il-Gvern bi Ftehim Nazzjonali fil-Libja reġa’ ħa f’idejh ir-raħal strateġiku ta’ Bani Walid mingħand il-qawwiet tal-kmandant Khalifa Haftar.
Dawn huma l-aħħar żviluppi li ġraw ġurnat wara li l-Gvern rikonoxxut mill-Ġnus Magħquda ħataf il-belt ta’ Tarhuna, li kienet il-post minn fejn kienu qegħdin isiru l-attakki fuq Tripli.
Din it-telf kienet waħda serja għal Haftar li ilu għaddej għal dawn l-aħħar 14-il xahar jattakka Tripli biex jieħu l-kontroll tagħha.
Jidher li issa l-Gvern qed ipoġġu ħarstu fuq Sirte, li hi l-belt fejn kien jgħix Muammar Gaddafi.
Madankollu, l-armata ta’ Haftar xorta għadha tikkontrolla żoni kbar fil-Lvant u anke fin-nofsinhar tal-Libja fejn hemm il-bjar taż-żejt ewlenin.
L-Eġittu, flimkien mal-Emirati Għarab Magħquda u r-Russja, qed jappoġġjaw lil Haftar. Madankollu, jidher li din l-għajnuna ġiet imxejna fl-aħħar xhur hekk kif it-Torok qed jappoġġjaw lill-Gvern bi Ftehim Nazzjonali.
Intant, The Libya Herald qiegħda tirrapporta li l-Armata Libjana għadha kemm ħadet kontroll tad-Distrett ta’ Wishka li jinsab fil-Punent ta’ Sirte.
Breaking News: Libyan army forces retake Wishka district, western Sirte, as part of “Operation Paths of Victory” to liberate Siret and Jufra pic.twitter.com/ZLfXdTQCuv
— The Libya Observer (@Lyobserver) June 6, 2020
