Il-Ministeru għall-Wirt Nazzjonali, l-Arti u l-Gvern Lokali daħal f’konvenju mas-sidien tas-sede tal-Banda King’s Own tal-Belt Valletta bil-għan li l-proprjetà tinxtara u b’hekk din is-soċjetà mużikali tiġi protetta minn riskju imminenti ta’ żgumbrament.
Din l-għaqda kienet f’dan ir-riskju minħabba s-sitwazzjoni legali marbuta mal-liġijiet tal-kera ta’ qabel l-1995.
B’kollox il-Gvern intrabat li jinvesti €7.4 miljun għall-akkwist tal-proprjetà bħala l-ħlas għax-xiri tal-binja u kif ukoll €1.8 miljun li jirrappreżentaw ħlas ta’ danni lis-sidien skont il-liġi.
Il-Ministru għall-Wirt Nazzjonali, l-Arti u l-Gvern Lokali Owen Bonnici spjega l-ħidma li qed issir biex jiġu salvati l-każini tal-baned li jinsabu f’riskju ta’ żgumbrament u qal li din il-ħidma hija ta’ prijorità anke fid-dawl tal-fatt li l-festa Maltija hija issa meqjusa bħala Wirt Intanġibbli tal-Umanità mill-UNESCO.
Il-ministru saħaq li b’dan il-konvenju, il-Gvern qiegħed għal darb’oħra juri l-impenn tiegħu li jasal għal soluzzjoni fejn aġixxa korrettament kemm mas-sidien kif ukoll mas-soċjetà mużikali nnifisha. Huwa spjega li fil-mument li jsir il-kuntratt finali, din il-proprjetà se tingħaqad mal-portafoll ta’ proprjetajiet li huma lkoll sede ta’ soċjetajiet mużikali li qed jiġu immaniġġjati minn sezzjoni apposta fi ħdan il-Kunsill Malti għall-Arti u li mbagħad is-soċjetajiet mużikali rispettivi jkunu marbuta li jħallsu l-kera lill-Gvern.
B’kollox huma tnax-il sede ta’ soċjetajiet mużikali li nxtraw b’mod konklussiv mill-ministeru sa issa. Dawn huma: is-sede tal-Għaqda tal-Mużika San Gejtanu AD 1906, is-sede tas-Soċjetà Mużikali Marija Reġina Marsa A.D.1977, is-sede tal-Għaqda Mużikali Stella Levantina ta’ Ħ’Attard, is-sede taċ-Circolo San Giuseppe Filarmonika Sagra Familja tal-Kalkara, is-sede tas-Soċjetà Każin Santa Liena Banda Duke of Connaught’s Own ta’ Birkirkara, is-sede tas-Soċjetà Mużikali Antoine de Paule ta’ Raħal Ġdid, is-sede tas-Soċjetà Mużikali Stella Maris ta’ Tas-Sliema, is-sede tal-Għaqda Mużikali San Pietru fil-Ktajjen ta’ Birżebbuġa, is-sede tal-Għaqda Soċjomużikali Anici ta’ Ħal Qormi, is-sede tas-Soċjetà Filarmonika Santa Marija Mosta, is-sede tas-Soċjetà Sant’Andrija ta’ Ħal Lija u s-sede tal-Banda 12th May f’Ħaż-Żebbuġ.
B’kollox il-Gvern, hekk kif isir ix-xiri formali tas-Sede tal-King’s Own, se jkun investa iktar minn €28 miljun fix-xiri tal-proprjetajiet imsemmija.
James Pearsall li huwa inkarigat mill-kumitat fi ħdan il-Kunsill Malti għall-Arti li jimmaniġġja dawn il-propjetajiet qal, “Dan huwa investiment f’qalb il-komunità Beltija, fejn il-King’s Own Band Club qed jiġi mħares u mogħti lura lin-nies. Il-każini tal-baned huma pilastri kulturali, jgħallmu l-mużika, iżommu l-festi ħajjin u jsaħħu l-identità Maltija. Inizjattiva li tħares il-wirt tagħna għall-ġenerazzjonijiet futuri”.
Preżenti għal din il-konferenza tal-aħbarijiet kien hemm ukoll il-President tal-Għaqda King’s Own il-Perit Ivan Piccinino, flimkien mal-Kumitat, is-Sindku tal-Belt Valletta, Olaf McKay, u membri tal-Kunsill Lokali tal-Belt.
