Il-General Workers’ Union (GWU) ġiet infurmata formalment mill-maniġment ta’ Carlo Gavazzi Limited bl-intenzjoni tal-kumpanija li twaqqaf l-operat tagħha f’Malta.
F’laqgħa li saret dalgħodu fuq talba tal-kumpanija, il-multinazzjonali bbażata fl-Iżvizzera ħabbret għeluq f’fażijiet tal-impjant tal-manifattura tagħha f’Bulebel, li se jwassal għal tnaqqis progressiv tal-ħaddiema kollha, mija u erbgħin, fix-xhur li ġejjin.
L-istqarrija uffiċjali tal-kumpanija ssemmi ristrutturar tal-fergħa tagħha, bil-produzzjoni ta’ prodotti li qabel kienu manifatturati f’Malta tiġi mċaqalqa lejn postijiet oħra tal-Grupp, partikolarment fl-impjanti fil-Messiku u fiċ-Ċina.
Il-GWU qed tiltaqa’ mal-impjegati kollha fl-impjant illum biex tikkomunika s-sitwazzjoni u tibda l-proċess ta’ konsultazzjoni. Huwa mifhum li l-ewwel redundancies mhux se jidħlu fis-seħħ qabel mill-inqas seba’ xhur oħra.
“Din hija daqqa ta’ ħarta serja għal forza tax-xogħol leali u li ilha taħdem għal snin twal, li tat deċennji minn ħajjitha lil din il-kumpanija,” qal is-Segretarju Ġenerali tal-GWU Josef Bugeja.
“Il-prijorità assoluta u immedjata tagħna huwa l-ġid ta’ dawn il-140 ħaddiema u l-familji tagħhom. Il-GWU se tuża s-saħħa u r-riżorsi kollha tagħha matul il-perjodu ta’ konsultazzjoni biex tiżgura li d-drittijiet ta’ kull impjegat jiġu mħarsa b’mod rigoruż u biex tikseb l-aħjar riżultat possibbli f’din is-sitwazzjoni diffiċli.”
Parti ċentrali mid-diskussjonijiet li ġejjin mal-kumpanija se tkun li jiġu nnegozjati miżuri biex jittaffew l-effetti ta’ dawn is-sensji, inkluż l-aħjar pakketti ta’ kumpens possibbli għall-ħaddiema kollha milquta.
B’mod parallel, il-GWU se tidħol minnufih f’diskussjonijiet mal-Ministeru għall-Ekonomija, il-Malta Enterprise, u kumpaniji privati oħra biex tesplora l-possibbiltajiet kollha ħalli l-impjegati affettwati jsibu impjieg alternattiv.
Carlo Gavazzi kienet parti integrali mix-xena tal-manifattura f’Malta għal kważi erba’ deċennji. Imwaqqfa fl-1988 bħala operazzjoni żgħira ta’ assemblaġġ, il-ħaddiema Maltin kienu strumentali biex jittrasformaw l-impjant f’ċentru komplet ta’ Riċerka u Żvilupp (R&D), ġestjoni tal-prodott, u manifattura.
Fl-2006, il-Grupp innifsu kien iddeżinja l-impjant ta’ Malta bħala wieħed mill-postijiet ewlenin tal-produzzjoni tiegħu, xhieda tal-ħila u d-dedikazzjoni tal-impjegati lokali tiegħu.
Il-GWU issa daħlet formalment f’perjodu ta’ konsultazzjoni ta’ 30 jum mal-kumpanija.