Il-General Workers’ Union (GWU) illum qed tħabbar il-bidu tal-fażi ta’ implimentazzjoni tal-ftehim li ntlaħaq f’Diċembru 2025 biex jappoġġja lill-81 ħaddiem f’Microtek Medical Malta. Hekk kif il-ftehim jidħol kompletament fis-seħħ dan ix-xahar, il-Union assigurat li kull impjegat affettwat beda s-sena l-ġdida b’moħħu mistrieħ rigward il-futur tax-xogħol tiegħu, permezz ta’ kumpens ġust u triq sigura ’l quddiem.
Wara l-għeluq tal-faċilità tal-kumpanija fil-Mosta, l-enfasi primarja tal-GWU kienet li tissostitwixxi l-inċertezza fost il-ħaddiema b’tranżizzjoni strutturata u protezzjoni tad-drittijiet tagħhom. Il-ftehim iffinalizzat mill-GWU wara djalogu soċjali intensiv fi tmiem is-sena 2025, qed jipprovdilhom pakkett finanzjarju li jmur lil hinn mir-rekwiżiti statutorji. B’hekk jingħataw iċ-ċans biex isibu impjieg ġdid mingħajr il-pressjoni ta’ instabbiltà finanzjarja immedjata.
Rita Dimech, Segretarju tat-Taqsima Kimika u Enerġija fi ħdan il-GWU, qalet li: “Il-missjoni tagħna kienet li nassiguraw li l-ebda membru ma jibda l-2026 b’dubji dwar il-futur tiegħu. Permezz tal-implimentazzjoni ta’ dan il-ftehim, issa qed nagħtu lil dawn il-ħaddiema l-għajnuna li tistħoqqilhom. Permezz tal-appoġġ kontinwu tagħna qed ngħinuhom isibu mpjieg ieħor, filwaqt li nassiguraw li l-lealtà tagħhom lejn il-kumpanija tiġi rikonoxxuta u ppremjata kif suppost.”
Is-Segretarju Ġenerali tal-GWU, Josef Bugeja żied jgħid lil: “Aħna ridna li dawn il-ħaddiema jibdew is-sena l-ġdida fuq nota pożittiva. Il-GWU ħadmet bla heda biex tassigura li t-tranżizzjoni tiġi ġestita b’dinjità. Il-membri tagħna issa għandhom bażi soda u sens ċar ta’ direzzjoni hekk kif iħarsu lejn impjiegi ġodda. Minbarra li ssalvagwardjajna d-drittijiet tagħhom u rajna li jingħataw pakkett finanzjarju, morna wkoll lil hinn u kkoordinajna biex jidħlu f’impjieg ġdid. Nibqgħu impenjati bis-sħiħ li nappoġġjaw lil kull ħaddiem matul din il-fażi finali tal-implimentazzjoni.”
Il-GWU se tkompli taħdem mill-qrib mal-impjegati affettwati biex tassigura li l-elementi kollha tat-tranżizzjoni jiġu esegwiti bla xkiel, filwaqt li tipprijoritizza l-istabbiltà tal-karriera fit-tul tal-membri tagħha.
