It-Taqsima Korpi Dixxiplinati, Uffiċjali tas-Sigurtà u tal-Infurzar tal-Liġi filwaqt li tirrikonoxxi l-progress kbir li sar fil-kundizzjonijiet tax-xogħol f’diversi setturi tul dan l-aħħar snin, partikolarment fil-Korpi Dixxiplinati tesprimi l-ħsieb tagħha dwar sitwazzjoni fejn ħaddiema li l-irwol tagħhom huwa wieħed operattiv u allura r-riskju fuq ħajjithom huwa ferm akbar qed ikollhom iħallsu polza tal-assikurazzjoni ħafna aktar għolja meta jiġu biex jieħdu self mill-banek.
Is-Segretarju tat-Taqsima Theo Vella qal li uffiċjali tal-Protezzjoni Ċivili u dawk is-suldati li l-irwol tagħhom huwa fis-salvataġġ, għaldaqstant xogħlhom huwa li jidħlu fil-periklu biex jipproteġu lil ħaddieħor, qed jispiċċaw iħallsu rati għolja ħafna aktar minn ħaddiema oħra li għandu rwol inqas riskjuż. Dan japplika wkoll għall-Uffiċjali Korrettivi u Pulizija li jkunu assenjati f’postijiet partikolari.
“Fil-proposti għall-baġit tas-sena d-dieħla t-Taqsima għamlet proposta biex dawn il-ħaddiema li qed iħallsu polza tal-assikurazzjoni għola minħabba n-natura tax-xogħol tagħhom, jiġu kumpensati għad-differenza li qed iħallsu fl-ewwel 3 xhur tas-sena suċċessiva. Din il-proposta ma kenitx imsemmija fid-diskors tal-baġit, iżda konxju wkoll li fl-aħħar snin il-gvern mhux l-ewwel darba li daħħal inċentivi u benefiċċji addizzjonali li ma kenux fid-diskors tal-baġit,” stqarr Vella.
Is-Segretarju tat-Taqsima għalhekk iħeġġeġ lill-gvern biex jimplimenta din il-proposta minkejja li ma kenitx imsemmija fil-baġit u dan sabiex titwettaq ġustizzja ma’ dawn il-ħaddiema.
