Fi stqarrija, il-Partit Laburista qal li huwa tassew inkredibbli li l-Partit Nazzjonalista jipprova jgħid li l-Gvern Laburista falla fejn tidħol l-ekonomija u l-manifattura.
Il-PL qal li l-unika ħaġa li l-PN jibqa’ mfakkar fiha hija li l-aħħar Ministru Nazzjonalista responsabbli minn dan is-settur kien saħansitra jilgħab l-imħatri li l-manifattura f’Malta kienet se tispiċċa fi żmien għaxar snin. “Dak hu l-wirt li ħalla l-PN: qtigħ ta’ qalb u nuqqas ta’ viżjoni.”
“Il-fatti huma ċari: taħt Gvern Laburista, in-numru ta’ ħaddiema full-time fil-manifattura żdied minn 20,000 fl-2012 għal 26,000 llum – żieda ta’ madwar 30%.
“Tant ma jafux x’qed jgħidu fuq kif il-Gvern qed jattira investiment dirett barrani, li mhux biss żdiedu l-impjiegi b’mod konsiderevoli, imma l-valur tal-investiment minn kumpaniji barranin f’Malta rdoppja minn €250 miljun fl-2012 għal madwar €500 miljun illum,” kompla jgħd il-PL.
“Din iż-żieda ġejja minn investimenti bla preċedent fil-manifattura avvanzata, fl-awtomazzjoni u fit-titjib fil-produttività. Il-kliem tal-PN hu offiża lejn l-eluf ta’ ħaddiema li kuljum jagħtu l-aqwa tagħhom u li bis-saħħa tagħhom Malta rnexxielha tattira u żżomm investiment.
“Gvern Laburista hu garanzija ta’ titjib kontinwu kemm fis-settur kif ukoll fit-taħriġ u l-kundizzjonijiet tal-ħaddiema. Il-ħaddiema Maltin jistgħu jkollhom rashom mistrieħa li taħt Gvern Laburista l-interessi tagħhom jibqgħu protetti u l-futur tagħhom assigurat.
“In-nies jafu kif dan il-Gvern daħħal sens ta’ fiduċja fil-qasam tax-xogħol li se jkompli jissarraf f’iktar ġid għall-Maltin bħal qatt qabel.”
Il-PL temm jgħid ukoll li “n-nies jafu wkoll li jinbidlu kemm jinbidlu kapijiet, il-Partit Nazzjonalista se jibqa’ l-istess. Partit tad-dwejjaq, bla sustanza u negattiv biss. Mill-PN ma tistenniex aħjar, meta lanqas kien kapaċi jagħmel pre-budget document, aħseb u ara jkollu viżjoni ekonomika.”