Il-ħarġa ta’ Settembru tal-gazzetta ‘IL-FURJANA’ li għadha kemm kienet ippubblikata, tinkludi tliet kitbiet ewlenin. Dawn it-tliet kitbiet kollha għandhom xeħta storika, partikolarment it-tnejn dwar żewġ anniversarji ewlenin.
Il-feature ewlieni ta’ din il-ħarġa, li hi l-ħames waħda li qed tkun ippubblikata din is-sena, hu dwar l-Anniversarju tad-Djamanti (1947-2022) mill-ftuħ uffiċjali tal-Lukanda Phoenicia.
Din il-lukanda lussuża, li tul dawn it-tliet kwarti ta’ seklu dejjem kienet ikkunsidrata bħala l-flagship tal-industrija tal-akkomodazzjoni f’pajjiżna, kienet laqgħet l-ewwel residenti f’Novembru ta’ 75 sena ilu. Għalkemm l-istorja tal-proġett ta’ din il-lukanda tmur lura kważi mitt sena.
Minbarra storja estensiva tal-lukanda, li hi wieħed mil-landmarks ewlenin li insibu fil-belt tal-Furjana, il-kitba hi akkumpanjata minn numru ta’ ritratti li jirrakkuntaw minn banda l-ġrajjiet ewlenin tal-Phoenicia u mill-banda l-oħra kemm ukoll kienet il-back-drop ta’ avvenimenti storiċi nazzjonali.
It-tieni anniversarju hu dak tal-50 sena minn meta Floriana FC fl-20 ta’ Settembru tal-1972 kitbu paġna oħra tad-deheb fl-istorja glorjuża tagħhom, għaliex fl-Empire Stadium tal-Gżira għelbu (1-0) lit-tim rinomat Ungeriż Ferencvarosi TC b’gowl ta’ Louis Arpa fl-ewwel minuti tal-partita.
Dan l-anniversarju sportiv qed jitfakkar b’ritratti tal-okkażjoni u statistika ġenerali tal-partita. Din kienet l-ewwel minn ħames rebħiet li Floriana FC kisbu tul is-sehem tagħhom fil-kompetizzjonijiet organizzati mill-UEFA.
It-tielet kitba hi dwar il-kripta li aktar kmieni din is-sena nstab li teżisti taħt il-Kappella li hemm fil-binja tal-Kurja tal-Arċisqof f’Balzunetta l-Furjana. Kripta li kienet infetħet għall-pubbliku għall-ewwel darba waqt open weekend tal-binja li sar f’Lulju li għadda. Din il-kitba hi akkumpanjata minn diversi ritratti esklussivi meħuda minn Ian Noel Pace, fotografu tal-Arċidjoċesi.
Minbarra dawn it-tliet kitbiet, il-ħarġa ta’ Settembru ta’ ‘IL-FURJANA’ tinkludi wkoll intervista ma’ Vincent Borg li minn Mejju li għadda hu s-Sindku tal-Furjana u qed imexxi l-Kunsill Lokali. F’kitba ta’ Julian Holland u ritratti tingħata ħarsa lejn id-dehra ġdida tal-Fsobians Club li reġa’ fetaħ il-bibien tiegħu aktar kmieni din is-sena.
Il-paġni tal-aħbarijiet jinkludu: tislima lill-eks Arċipriet tal-Furjana Monsinjur Ġużepp Pace; ktieb ippubblikat fl-Awstralja mill-ġurnalista Furjaniż Philip Micallef; Festival Ċinematografiku f’ċimiterju fil-Furjana; il-ħatra ta’ qassis Furjaniż bħala Delegat għall-Katekeżi; u kitba u ritratti dwar ħawt tal-ġebel li kien instab fil-Wardija b’konnessjoni possibbli ma’ San Publju.
Min jixtieq jakkwista kopja ta’ din il-ħarġa tal-gazzetta ‘IL-FURJANA’ jew inkella jabbona għal €5 biss fis-sena, jista’ jċempel fuq in-numru 79339649.
Sadattant bħalma tħabbar ftit jiem ilu, id-Direzzjoni ta’ ‘IL-FURJANA’ qed taħdem biex fl-iqsar żmien possibbli tippubblika ħarġa speċjali oħra tal-gazzetta, din id-darba dwar ir-Reġina Eliżabetta II tal-Ingilterra li mietet fit-8 ta’ Settembru 2022. Din il-ħarġa se tkun mimlija stejjer umani dwar Furjaniżi li kellhom xi konnessjoni magħha.