Il-Prim Ministru ħabbar li l-Kabinett approva bidliet biex tissaħħaħ il-ġlieda tagħna fejn tidħol vjolenza bbażata fuq il-ġeneru u biex il-kunċett ta’ femiċidju jiġi introdott fil-Kodiċi Kriminali ta’ pajjiżna.
Huwa ħabbar dan illum wara nofsinhar fejn permezz ta’ messaġġ fuq il-midja soċjali huwa attribwixxa dan għal djalogu li f’dawn l-aħħar ġimgħat kellu mas-soċjetà ċivili.
“Filwaqt li nagħtu iktar dettalji fil-jiem li ġejjin, qed inħarsu ‘l quddiem biex il-proċess parlamentari jibda mill-aktar fis,” qal il-Prim Ministru.
Fl-aħħar ġimgħat bosta kienu dawk l-organizzazjonijiet, fosthom il-Malta Women’s Lobby, fejn saħqu li jemmnu li wasal iż-żmien li tinbidel il-liġi Maltija dwar il-vjolenza abbażi tal-ġeneru u domestika u li tħaddan id-definizzjoni skont il-Konvenzjoni ta’ Istanbul.
Fost l-oħrajn, fl-isfond tal-qtil ta’ Paulina Dembska, l-organizzazzjoni emPOWer qalet li dan il-qtil għandu jitqies bħala femiċidju u dan it-terminu għandu jsib postu fil-liġi Maltija.
Il-qtil ta’ Dembska qajjem ħafna diskussjonijiet u mistoqsijiet b’mod speċjali meta l-akkużi fil-Qorti ppreżentati mill-Pulizija ma sarux fuq femiċidju, iżda omiċidju.
