L-attakkant ta’ Leeds United, Raphinha, se jara klawsola ta’ release ta’ £25 miljun fil-kuntratt tiegħu tidħol fis-seħħ jekk il-club jiġi relegat mill-Premier League dan l-istaġun.
Anke jekk il-Whites bħalissa jinsabu seba’ punti ’l bogħod miż-żona tar-relegazzjoni, huma għadhom f’battalja biex iżommu posthom mal-elite tal-football Ingliż hekk kif l-erba’ timijiet taħthom għandhom mill-inqas logħba waħda f’idejhom.
Raphinha kien wieħed mill-aktar players brillanti ta’ Leeds fl-istaġun tal-ogħla livell tagħhom 2021-22, fejn skorja disa’ goals u pprovda tliet assists f’27 dehra tal-kampjonat.
Barcelona huma maħsuba li jinsabu f’taħditiet avvanzati biex jiffirmaw lill-internazzjonali Brażiljan, b’rapport wieħed jgħid li qablu fi ftehim ta’ ħames snin biex jiffirmawh dan is-sajf, filwaqt li Manchester City, Manchester United, Chelsea u Liverpool irreġistraw ukoll l-interess tagħhom f’dan il-player.
Huwa mifhum li l-kuntratt ta’ Raphinha jinkludi żewġ klawsoli ta’ release, b’waħda biss tidħol fis-seħħ skond jekk Leeds iżommux posthom jew le fil-Premier League.
Jekk il-Whites jibqgħu fl-ogħla livell tal-football Ingliż, allura Raphinha jkun disponibbli għal £75m, iżda jekk jiġu relegati għaċ-Championship, allura clubs interessati jistgħu jiffirmaw lill-attakkant għal mill-inqas £25m.
Raphinha, li se jara l-ftehim attwali tiegħu f’Elland Road jiskadi f’Ġunju 2024, temporanjament waqqaf it-taħditiet tiegħu dwar il-kuntratt waqt li qed jikkunsidra l-futur tiegħu ma’ Leeds United.
