Il-Kunsill Nazzjonali tal-Ktieb ippubblika l-lista tal-kotba eliġibbli li ġew sottomessi għall-aġġudikazzjoni tal-Premju Nazzjonali tal-Ktieb u l-Premju Terramaxka 2022, b’kotba ppubblikati fl-2021. Il-Premju Nazzjonali tal-Ktieb huwa l-ogħla premju letterarju mogħti lil awturi, edituri, tradutturi, pubblikaturi, u illustraturi ta’ kotba b’ISBN lokali.
It-tmien kategoriji fil-Premju Nazzjonali tal-Ktieb għall-Adulti huma: rumanzi, novelli, poeżija, drama, letteratura mhux fittizja, traduzzjoni, riċerka ġenerali, u riċerka bijografika u storjografika. Is-sitt kategoriji tat-Terramaxka huma: xogħlijiet oriġinali għal tfal ta’ bejn 0–7, 8–12 u letteratura għaż-żgħażagħ, kif ukoll xogħlijiet maqluba għall-Malti għal tfal ta’ bejn 0–7, 8–12, u letteratura għaż-żgħażagħ. Il-Premju Nazzjonali tal-Ktieb għall-adulti u l-Premju Terramaxka għat-tfal u ż-żgħażagħ se jsiru f’ċerimonja waħda tal-għoti tal-premjijiet, fl-4 ta’ Novembru 2022.
B’kollox kien hemm rekord ta’ 199 sottomissjoni eliġibbli: 107 mqassmin fit-tmien kategoriji tal-Premju Nazzjonali tal-Ktieb għall-adulti, u 92 imqassmin fis-sitt kategoriji tal-Premju Terramaxka. Il-lista tal-finalisti tal-Premju Nazzjonali tal-Ktieb u l-Premju Terramaxka se tkun ippubblikata f’Lulju li ġej.