Il-ko-proprjetarju ta’ Inter Miami, Jorge Mas, żvela li l-club se “jagħmle minn kollox” biex jipprova jiffirma lil Lionel Messi mingħand Paris Saint-Germain.
L-internazzjonali Arġentin ingħaqad mal-club Franċiż biss fil-bidu tal-istaġun wara t-tluq tiegħu minn ma’ Barcelona, u dan l-istaġun għamel 16-il dehra fil-Ligue 1, u fil-proċess skorja żewġ goals.
Messi għandu relazzjoni tajba ma’ David Beckham, li huwa wkoll involut fil-club tal-Major League Soccer, iżda bħalissa mhux magħruf jekk l-attakkant hux qed jippjana li jħalli t-team attwali tiegħu.
“Leo Messi għadu wieħed mill-aqwa players fid-dinja, il-ħiliet tiegħu ma naqsux. David Beckham għandu relazzjoni tajba miegħu, jekk iħalli lil PSG, inkunu kuntenti li naraw lil Lionel Messi bħala player ta’ Inter Miami u jkun parti mill-komunità tagħna,” qal Mas.
Messi kiseb assist fi tmiem il-ġimgħa waqt ir-rebħa ta’ 3-1 ta’ PSG fuq Saint Etienne.
