Ġie ppubblikat l-Istħarriġ Ġenerali tal-Popolazzjoni dwar l-Użu tal-Alkoħol, it-Tabakk, u d-Droga f’Malta fl-2023, li jipprovdi ħarsa ġenerali komprensiva lejn l-użu tas-sustanzi fost ir-residenti Maltin ta’ bejn it-18 u l-65 sena. Imtlew madwar 3,400 kwestjonarju, u b’hekk ġiet żgurata stampa rappreżentattiva tax-xejriet tal-konsum matul l-aħħar żewġ deċennji. L-istħarriġ, li jsir kull għaxar snin, isegwi x-xejriet fit-tul u jipprovdi għarfien siewi dwar l-alkoħol, it-tabakk, il-kannabis, id-drogi bir-riċetta, l-użu ta’ drogi illeċiti, il-logħob tal-azzard, u oqsma emerġenti bħall-vaping u l-kannabis mediċinali.
Is-sejbiet tal-istħarriġ jindikaw li l-konsum tal-alkoħol għadu mifrux, b’żidiet osservati fost in-nisa. Filwaqt li l-użu riċenti tal-alkoħol żdied xi ftit, il-konsum ta’ kull xahar baqa’ stabbli. Porzjon sinifikanti ta’ dawk li jixorbu juru xejriet konsistenti ma’ użu riskjuż tal-alkoħol.
L-użu tat-tabakk qed ikompli jonqos, b’inqas adulti jpejpu meta mqabbel mas-snin ta’ qabel. Id-differenza bejn l-irġiel u n-nisa li jpejpu qed tonqos, għalkemm id-drawwiet u l-intensità tat-tipjip ivarjaw fost l-utenti attwali.
L-użu tal-kannabis insibuh, partikolarment fost l-adulti żgħażagħ u l-irġiel. Il-bidu għandu t-tendenza li jseħħ fl-aħħar tal-adolexxenza jew fil-bidu tal-età adulta, u l-użu huwa l-aktar komuni fil-grupp ta’ età ta’ bejn it-18 u l-24 sena.
Il-Ministru għall-Politika Soċjali u d-Drittijiet tat-Tfal Michael Falzon qal li l-Ministeru se jkun qed jipprijoritizza sforzi ta’ prevenzjoni msaħħa. Dan f’konformità mal-Politika Nazzjonali dwar id-Droga tal-2023, għaddej xogħol biex jiġi stabbilit Korp ta’ Koordinazzjoni tal-Prevenzjoni. Dan il-korp se jgħaqqad flimkien il-partijiet interessati rilevanti kollha biex jiżgura li l-istrateġiji ta’ prevenzjoni jkunu kkoordinati, ibbażati fuq l-evidenza, u effettivi.
Min-naħa tiegħu, il-Kap tan-National Focal Point (NDAU), Manuel Gellel qal li l-istħarriġ jenfasizza wkoll il-ħtieġa għal aktar azzjoni dwar il-konsum tal-alkoħol, partikolarment rigward it-tnaqqis tad-distakk bejn l-imġieba tax-xorb tal-irġiel u tan-nisa. Intant il-Ministeru qed jipprepara biex iniedi Politika Nazzjonali dwar l-Alkoħol imġedda, immirata lejn is-salvagwardja tas-saħħa pubblika u l-promozzjoni tal-benesseri tas-soċjetà.
Il-Politika Nazzjonali dwar id-Droga tenfasizza l-importanza ta’ investiment addizzjonali f’servizz low threshold u f’miżuri ta’ tnaqqis tal-ħsara għal individwi li jużaw id-drogi b’mod attiv. Il-Ministeru jibqa’ impenjat li jilħaq lill-aktar membri vulnerabbli tas-soċjetà b’kompassjoni, dinjità, u mingħajr ġudizzju, u b’hekk isaħħaħ id-dedikazzjoni ta’ Malta għal komunità sikura, b’saħħitha, u inklużiva.