Il-Korea ta’ Fuq qatgħet l-aċċess kollu tat-toroq u tal-ferroviji lejn il-Korea t’Isfel mill-Erbgħa fi sforz biex tissepara għal kollox iż-żewġ Koreji. Il-militar tat-Tramuntana għalaq b’mod permanenti u mblokka l-fruntiera tan-Nofsinhar sabiex isaħħaħ iż-żoni fuq in-naħa tiegħu.
L-Armata Popolari Koreana (KPA) iddeskriviet il-mossa bħala miżura awto-difensiva għall-inibizzjoni tal-gwerra u sostniet li l-miżura kienet bi tweġiba għall-eżerċizzji tal-gwerra fil-Korea t’Isfel u l-preżenza frekwenti ta’ assi nukleari Amerikani fir-reġjun.
Dan jimmarka eskalazzjoni ta’ ostilità fi żmien meta t-tensjonijiet bejn iż-żewġ Koreji jinsabu fl-ogħla livell tagħhom fi snin.
Is-sitwazzjoni militari akuta prevalenti fil-peniżola Koreana teħtieġ li l-forzi armati tar-Repubblika Demokratika tal-Poplu tal-Korea jieħdu miżura aktar riżoluta u aktar b’saħħitha sabiex jiddefendu b’mod aktar kredibbli s-sigurtà nazzjonali, qalet il-KPA f’rapport ippubblikat mill-midja statali KCNA.
Id-dikjarazzjoni hija pass fil-biċċa l-kbira simboliku minn Pyongyang. Toroq u ferroviji li jivvjaġġaw mill-Korea ta’ Fuq għan-Nofsinhar rarament jintużaw, u ġew żarmati b’mod inkrementali mill-awtoritajiet tal-Korea ta’ Fuq matul is-sena li għaddiet.
Din il-miżura qed issir ukoll fost spinta usa’ minn Pyongyang biex jibdel il-mod kif jirrelata man-Nofsinhar, u jsegwi sensiela ta’ inċidenti infjammatorji li mminaw ir-relazzjonijiet bejn iż-żewġ pajjiżi.
Dawk l-inċidenti varjaw minn testijiet tal-missili sa mijiet ta’ blalen taż-żibel li intbagħtu fuq il-fruntiera tan-Nofsinhar tal-Korea ta’ Fuq.
Notevolment, il-mexxej tal-Korea ta’ Fuq Kim Jong-un ħabbar fil-bidu tal-2023 li ma kienx għadu jistinka lejn ir-riunifikazzjoni taż-żewġ Koreji, u qajjem tħassib li l-gwerra tista’ terġa’ tibda fil-peniżola Koreana.
Fil-fehma ta’ Kim Jong-un, huwa meħtieġ li jitħassru tali espressjonijiet fil-kostituzzjoni għall-indipendenza, riunifikazzjoni paċifika u għaqda nazzjonali kbira u waqt laqgħa tal-Assemblea Suprema tal-Poplu (SPA) tal-Korea ta’ Fuq f’Jannar issuġġerixxi li l-kostituzzjoni għandha tiġi riveduta fis-sessjoni li jmiss.
Is-sessjoni li jmiss saret din il-ġimgħa, u ġiet konkluża nhar it-Tlieta. Madankollu, filwaqt li ħafna nies stennew li Pyongyang jirratifika l-kummenti preċedenti ta’ Kim u jagħmel emendi kostituzzjonali għall-politiki tal-unifikazzjoni u tal-fruntieri, l-ebda tibdil bħal dan ma ġie ppubbliċizzat.
Analista fl-Istitut tal-Korea għall-Unifikazzjoni Nazzjonali issuġġerixxa li Pyongyang jista’ jkun qed jistenna r-riżultat tal-elezzjoni tal-Istati Uniti qabel ma jieħu xi deċiżjonijiet konkreti.
Uffiċjali jistgħu jikkunsidraw li jaġġustaw il-firxa tar-reviżjonijiet kostituzzjonali biex jallinjaw mad-direzzjoni tal-amministrazzjoni l-ġdida Amerikana qal Hong Min lill-aġenzija tal-aħbarijiet AFP.
Mhux ċar jekk id-deċiżjoni tal-Korea ta’ Fuq li taqta’ t-toroq u l-ferroviji kollha li jgħaqqduha man-Nofsinhar kinitx riżultat ta’ diskussjonijiet waqt is-sessjoni tal-SPA.
