Il-kumpanija Tesla, li timmanifattura karozzi li jaħdmu bl-elettriku, spiċċat fiċ-ċentru ta’ kritika qalila wara li din fetħet showroom fir-reġjun kontroversjali Ċiniż Xinjiang. Il-kumpanija, li hija mmexxija mill-biljunarju Elon Musk, fetħet din ix-showroom f’lejliet l-Ewwel tas-Sena ġewwa l-belt ta’ Urumqi. Fuq naħa din id-deċiżjoni kienet ikkritikata mill-Istati Uniti u min-naħa l-oħra kienet imfaħħra miċ-Ċina.
Din id-deċiżjoni kienet ikkritikata minħabba li bosta huma dawk il-pajjiżi li qed jakkużaw liċ-Ċina bi skjavitù u ġenoċidju fil-konfront tal-minorità Uyghur ġewwa r-reġjun Xinjiang, li huwa wieħed mill-iktar sinjuri taċ-Ċina.
F’Diċembru l-Istati Uniti kienet daħħlet liġi li kienet tgħid li l-prodotti kollha li jiġu impurtati minn Xinjiang irid ikun żgurat li ma jkunux saru b’xogħol sfurzat. Is-Senatur Repubblikan Marco Rubo, li kien appoġġja l-abbozz ta’ liġi msemmi iktar kmieni, qal li “korporazzjonijiet bla stat qed jgħinu lill-partit komunista Ċiniż biex jaħbi l-ġenoċidju u l-iskjavitù f’dan ir-reġjun.”
