Il-Malta Handball Association (MHA) ospitat b’suċċess tmiem il-ġimgħa ta’kowċing intensiv bejn is-16 u t-18 ta’ Jannar, li ġabar flimkien kowċis lokali u internazzjonali għal sensiela ta’ sessjonijiet tekniċi u edukattivi ta’ livell għoli, bil-għan li jkomplu jissaħħu l-istandards tal-kowċing f’Malta.
Wieħed mill-punti ewlenin ta’ dan il-kowċing kien il-kontribut tal-kowċ Daniż tal-handball Allan Heine, Kap tal-Youth Coaching & Academy ta’ Aalborg Håndbold u espert tal-European Handball Federation (EHF), li kien Malta biex imexxi diversi sessjonijiet bħala parti mill-Kors ta’ Kowċing fit-Tieni Livell tal-Assoċjazzjoni.
Il-programm għaqqad elementi teoretiċi u prattiċi fuq medda ta’ tlett ijiem, b’sessjonijiet li saru fl-Uffiċċju tal-MHA, kif ukoll fil-courts tal-Università ta’ Malta u ta’ Ħamrun. Is-suġġetti ppreżentati minn Heine inkludew il-metodoloġija Daniża tal-kowċing, il-vjaġġ personali tiegħu fil-kowċing, l-iżvilupp individwali tal-plejers, kif ukoll strateġiji difensivi u offensivi, u b’hekk offrew lill-parteċipanti esperjenza ta’ tagħlim komprensiva u bilanċjata.
B’referenza għall-esperjenza tiegħu f’Malta, Heine qal:
“Għalija kienet pjaċir kbir li nikkontribwixxi f’dan il-kors tal-EHF f’Malta. Il-parteċipanti kienu kurjużi u impenjati, fatt li għamel il-kors kemm ispiranti kif ukoll pjaċevoli. Jiena tassew grat għall-opportunità u qed nitlaq b’esperjenza professjonali ta’ valur u apprezzament b’saħħtu lejn il-handball Malti u l-iżvilupp tiegħu.”
It-tmiem il-Ġimgħa ta’kowċing attira parteċipazzjoni tajba matul is-sessjonijiet kollha. Din tenfasizza l-impenn tal-komunità lokali tal-handball lejn żvilupp kontinwu u xogħol tekniku ta’ kwalità għolja. Il-programm strutturat ippermetta interazzjoni sinifikanti, applikazzjoni prattika fuq il-grawnd u diskussjoni fil-fond, u saħħaħ il-prinċipji tal-aħjar prattika fil-kowċing skont l-istandards tal-EHF.
Id-Direttur Tekniku tal-Assoċjazzjoni, David Ruch, laqa’ l-impatt pożittiv tas-sessjonijiet, u stqarr:
“Is-sessjonijiet ta’ Allan Heine esponu lill-kowċis tagħna għal standards ta’ livell elite, billi għaqqdu metodoloġija strutturata ma’ applikazzjoni prattika. L-involviment b’saħħtu matul din it-tmiem il-ġimgħa kollu juri l-impenn tal-komunità tal-handball biex tgħolli l-kwalità teknika u tifhem aħjar ir-rekwiżiti tal-kowċing ta’ prestazzjoni għolja.”
Il-President tal-Malta Handball Association, Daniel Tabone, innota:
“Il-parteċipazzjoni pożittiva u l-livell ta’ involviment huma indikaturi ċari li l-komunità lokali tal-kowċing qed tinvesti bis-serjetà fl-edukazzjoni u fl-iżvilupp fit-tul. Dan jiżgura li plejers ta’ kull livell jibbenefikaw minn approċċi ta’ kowċing infurmati, moderni u strutturati. Nirringrazzjaw lill-EHF għall-appoġġ kontinwu tagħha.”
Il-Malta Handball Association estendiet ir-ringrazzjament tagħha lil Allan Heine għall-kontribut tiegħu, kif ukoll lill-kowċis kollha li ħadu sehem f’dan l-avveniment, filwaqt li reġgħet ikkonfermat l-impenn tagħha li tkompli toffri inizjattivi edukattivi li jappoġġjaw it-tkabbir sostenibbli tal-handball f’Malta.