L-Assoċjazzjoni ta’ Min Iħaddem (MEA) sostniet li fuq skala makro, il-karatteristika ewlenija tal-baġit hija d-deċiżjoni tal-gvern li jerfa’ żieda fil-prezzijiet tal-fjuwil, tal-enerġija u taċ-ċereali fuq in-negozji u l-konsumaturi biex iżommu l-istabbiltà ekonomika u l-kompetittività tal-prezzijiet. Dan huwa fundamentali f’xenarju globali fejn ħafna pajjiżi qed jesperjenzaw rati ta’ inflazzjoni li ilhom ma jarawhom għal aktar minn 40 sena.
Il-baġit adotta approċċ immirat, li jiżgura dixxiplina fin-nefqa tal-gvern filwaqt li ħa miżuri attivi biex jappoġġja d-dħul tal-familja mingħajr piżijiet żejda fuq in-negozji. Dan jidher li ħa preċedenza fuq in-nefqa kapitali.
L-MEA taqbel mal-għan imħabbra tal-Ministru li jkun hemm linja tal-ajru nazzjonali vijabbli. L-Assoċjazzjoni żiedet tgħid li biex tali għan jintlaħaq, il-linja tal-ajru trid titmexxa fuq bażi kummerċjali, ħielsa minn indħil motivat politikament.
Kollox ma’ kollox, filwaqt li d-diskors tal-baġit indirizza l-kwistjonijiet immedjati, li jistgħu jinftehmu f’sitwazzjoni globali inċerta, l-MEA tinnota li dan irid ikun akkumpanjat b’direzzjoni ekonomika fuq medda itwal ta’ żmien.
Dan jinkludi strateġija ċara tar-riżorsi umani li għandha ssegwi l-eżerċizzju taċ-ċensiment tal-ħiliet, flimkien ma’ pjan ta’ trasformazzjoni ekonomika biex jiġi massimizzat il-potenzjal ekonomiku tal-pajjiż filwaqt li tiġi salvagwardjata l-kwalità tal-ħajja tan-nies.
