Il-Medcomms Round Malta Race għalqet l-istaġun kompetittiv tat-tlielaq tal-Royal Malta Yacht Club b’flotta rekord ta’ 30 jott, imqassma bejn id-diviżjonijiet Racing u Cruising. Parteċipazzjoni b’saħħita kkonkludiet staġun li ra tkabbir notevoli fil-klassijiet tal-cruising, kemm fil-livell ta’ parteċipazzjoni kif ukoll fil-kompetittività, b’flotta soda u dejjem aktar bilanċjata f’kull diviżjoni.
Ir-Rear Commodore (Sailing) Adrian Gauci Borda laqa’ l-iskala tal-parteċipazzjoni u l-mod kif intemm l-istaġun, u nnota: “Li nagħlqu s-sena bil-Medcomms Round Malta Race ta’ din id-daqs huwa ta’ inkoraġġiment kbir. Il-parteċipazzjoni tajba li rajna f’kull diviżjoni — mir-racing sal-cruising — turi n-natura dejjem aktar inklużiva tal-programm tal-Club. Li nġibu flimkien flotta daqshekk kbira, varjata u kompetittiva biex nagħlqu l-istaġun jawgura tajjeb għal interess u parteċipazzjoni kontinwa tul il-kalendarju tal-2026.”
It-tiġrija, fuq korsa madwar Malta bdiet mill-port ta’Marsamxett u kompliet lejn il-Fairway Buoy, il-marki kardinali ta’ Munxar u Bengħajsa, u mbagħad fuq korsa libera lejn iċ-Ċirkewwa. Ir-rotta kompliet mill-fliegu ta’ Kemmuna, fejn spiċċat ġewwa Marsamxett viċin ir-Royal Malta Yacht Club.
L-Uffiċjal tat-Tellieqa Martin Azzopardi mexxa tliet klassijiet separati. Bdew bil-klassi RMYC Cruisers, segwiti mill-IRC Cruisers u l-IRC Racing Class. Riħ mil-Lvant ta’ Forza 3–4, flimkien ħolqu tiġrija li kienet taktika u impenjattiva.
Fil-klassifika overall, l-istess tliet jottijiet li kienu fuq il-podju s-sena l-oħra reġgħu kisbu l-ewwel tliet postijiet, iżda b’bidla fil-quċċata. Elusive 2, tal-aħwa Aaron, Christoph u Maya Podesta, kisbet ir-rebħa overall quddiem Calypso ta’ Sebastian Ripard, filwaqt li Jubatus ta’ Sean Borg spiċċat fit-tielet post. Għalkemm Jubatus kienet l-ewwel dgħajsa li spiċċat it-tellieqa, ftit sekondi biss qabel Elusive 2, il-fatturi ta’ rating u korrezzjoni tal-ħin finalment taw ir-rebħa lill-familja Podesta.
Meta rrifletta dwar ir-rebħa, Aaron Podesta, ko-skipper ta’ Elusive 2, qal:
“Tiġrija madwar Malta b’riħ kostanti mit-Tramuntana-Lvant offriet ġurnata sabiħa u tattika ħafna fuq l-baħar. Kull deċiżjoni kienet tgħodd, il-kundizzjonijiet żammewna ffukati, u l-ħidma f’tim wasslitna għar-rebħa. Kienet ġurnata mill-isbaħ ta’ tlielaq u mod sabiħ kif nagħlqu s-sena fuq Elusive. Grazzi, RMYC.”
Sebastian Ripard ta’ Calypso, enfasizza wkoll kemm il-kundizzjonijiet kif ukoll id-daqs tal-flotta: “Il-Medcomms Round Malta inħasset bħal li kieku kienet tellieqa fis-sajf, b’ħafna xemx u riħ ħafif mil-Lvant li għamel it-tellieqa pjaċevoli iżda tattikament intensiva. Kien kuntrast qawwi mit-tellieqa tas-sena l-oħra, iżda daqstant ieħor impenjattiva. Dak li verament spikka, però, kienet il-flotta — kien hemm ħafna dgħajjes, u ħassejtni onorat li kont parti minn komunità daqshekk kbira.”
Fil-klassi IRC Cruisers, Inspiration, immexxija minn Godwin Zammit, rebħet quddiem Spirit of the Winds ta’ Simon Xuereb. Il-klassi RMYC Cruisers attirrat flotta partikolarment b’saħħitha u varjata, inkluż diversi dgħajjes li kienu qed jieħdu sehem għall-ewwel darba. Xpalidocious, ta’ David Pizzuto, iddominat il-klassi, u spiċċat l-ewwel kemm fil-ħin reali kif ukoll fil-ħin korrett, b’distakk tajjeb fuq Gregale ta’ Patrick Hamilton Hill li spiċċa fit-tieni post u Gioia ta’ Anthony Miggiani li spiċċat fit-tielet.
Il-Commodore tal-Royal Malta Yacht Club Mark Napier irrikonoxxa l-appoġġ kontinwu tal-isponsor, u nnota li “Il-Medcomms Round Malta Race saret appuntament importanti fil-kalendarju tagħna. Il-Club huwa grat lejn Medcomms għall-appoġġ kontinwu tagħhom. Dan l-appoġġ jgħinna nwasslu tlielaq ta’ kwalità u nżommu l-momentum li qed naraw f’kull klassi.”
Il-premjijiet tal-Medcomms Round Malta Race se jiġu ppreżentati matul it-tmiem il-ġimgħa li ġej..
Il-Club esprima wkoll ir-ringrazzjamenti tiegħu lir-Race Management Team, immexxi minn Martin Azzopardi, flimkien ma’ Michelle Caruana, Adrian Gauci Borda u Arthur Van Der Deijl.
Riżultati tal-Medcomms Round Malta Race
IRC Racers – Klassifika Overall
- Elusive 2 (Aaron, Christoph, Maya Podesta)
- Calypso (Sebastian Ripard)
- Jubatus (Sean Borg)
IRC Class 2
- Vivace (Andrew Agius Delicata / Matthew Gabriele)
- Lartista (Anthony Calleja)
- Time Out (Mario Sant)
IRC Cruisers
- Inspiration (Godwin Zammit)
- Spirit of the Winds (Simon Xuereb)
RMYC Cruisers
- Xpalidocious (David Pizzuto)
- Gregale (Patrick Hamilton Hill)
- Gioia (Anthony Miggiani)
Il-Club habbar ukoll il-kalendarju ta’ tlielaq għas-sena li ġejja u dan jinsab fuq is-sit elettroniku www.rmyc.org