Uffiċjali Palestinjani qalu li minn tal-inqas ħames persuni nqatlu f’attakk mill-ajru Iżraeljan fuq kamp tar-refuġjati fix-Xatt tal-Punent
Il-Forzi tad-Difiża ta’ Iżrael (IDF) ikkonfermaw li seħħ dan l-attakk fuq il-kamp ta’ Nur Shams qrib il-belt ta’ Tulkarm u qalu li fil-mira tagħhom kien hemm dak li sejħulu l-“command room”.
Separatament, l-Awtorità Palestinjana qalet li persuna waħda nqatlet u tliet oħra ndarbu f’attakk minn kolonji Iżraeljani li seħħ qrib Betlehem. L-IDF qalet li qiegħda tinvestiga dawn ir-rapporti.
Il-kamp ta’ Nur Shams kien fil-mira tal-IDF diversi drabi f’dawn l-aħħar xhur. F’April li għadda kien irrapportat li mietu 14-il persuna f’operazzjoni Iżraeljana li damet għaddejja jumejn. U f’Lulju li għadda l-IDF baqgħet għaddejja mit-triq prinċipali tal-kamp.
Fit-tieni attakk irrappurtat nhar it-Tnejn qrib Betlehem, il-midja Palestinjana qalet li għexieren ta’ kolonji Iżraeljani daħlu fir-raħal ta’ Wadi Rahhal, u allegatament attakkaw lir-residenti.
L-uffiċjali Palestinjani qalu li dawn il-kolonji qatlu raġel Palestinjan ta’ 40 sena u darbu minn tal-inqas tlieta oħra.
