Il-Partit Laburista jifraħ lis-Segretarju Internazzjonali tal-Partit John Grech għall-ħatra prestiġjuża tiegħu bħala Chairperson tal-Kumitat għall-Mediterran tas-Socialist International. Din hija l-ewwel darba fl-istorja li rappreżentant tal-Partit Laburista Malti jingħata dan ir-rwol u tirrifletti l-ħidma kontinwa tal-Partit favur politika progressiva u b’viżjoni reġjonali.
Dan l-iżvilupp jikkonferma r-rikonoxximent li l-Partit Laburista qed jirċievi minn partiti sħab madwar id-dinja, partikolarment fi ħdan il-familja soċjalista internazzjonali, u jixhed kemm il-Partit Laburista jgawdi reputazzjoni tajba fuq livell globali, partikolarment fil-Mediterran.
Il-Kunsill tas-Socialist International, immexxi mill-Prim Ministru Spanjol Pedro Sánchez, se jiltaqa’ f’Malta lejn l-aħħar tas-sena f’avveniment ta’ importanza politika. Il-Partit Laburista jibqa’ kommess li jaħdem favur il-ġustizzja soċjali, il-paċi, u l-kooperazzjoni bejn il-pajjiżi tal-Mediterran u jħares ’il quddiem biex jilqa’ f’pajjiżna dan l-avveniment importanti.