Minn Cristian Muscat
Il-ġimgħa li għaddiet kienet ikkunsidrata bħala waħda storika għall-isport f’Għawdex hekk kif il-Prim Ministru Robert Abela, flimkien mal-Ministru għal Għawdex Clint Camilleri, inawguraw il-Padiljun Sportiv u Akkwatiku fir-Rabat, Għawdex. Din il-faċilità moderna u ta’ livell internazzjonali hija l-akbar investiment sportiv li qatt rajna fil-gżira Għawdxija.
Il-Padiljun għandu faċilitajiet għall-isport akkwatiku u oħrajn multipli bħal basketball, futsal, tennis, table tennis, padel, squash, badminton, volleyball, netball u handball, flimkien ma’ żoni speċjalizzati għall-ġinnastika, iż-żfin u l-arti marzjali.
Il-Pixxina Olimpika ġdida mhux biss se tipprovdi faċilitajiet ta’ kwalità għolja, iżda se tkun ukoll ċentru ta’ taħriġ għall-atleti Għawdxin ta’ kull età, livell u sport. Il-Ministru Camilleri enfasizza li dan il-proġett se jpoġġi lil Għawdex fuq il-mappa internazzjonali tal-isport, u se jżid opportunitajiet tat-turiżmu sportiv u l-organizzazzjoni ta’ logħob internazzjonali. Madankollu, għal ħafna klabbs lokali, inkluż Otters Waterpolo Club, din il-faċilità mhix biss proġett ambizzjuż tal-Gvern – hi realizzazzjoni ta’ snin ta’ ħolm u ħidma impenjattiva li ilu għaddej għal dawn l-aħħar snin.
Paul Dimech hu l-viċi-president ta’ Otters Waterpolo Club. F’intervista li ħadnilu, hu jgħid li l-klabb ilu jinvesti ħafna fis-suċċess tal-atleti tiegħu u fl-iżvilupp tal-logħba f’Għawdex.
“Hemm ħafna xogħol wara l-kwinti li mhux dejjem jidher,” jgħid Paul. “Jiena ngħin fil-loġistika tal-gruppi kollha fejn għandna tliet timijiet u mmexxi l-aspetti tekniċi kollha tal-klabb u l-proġetti tagħna. L-għan dejjem kien li nibnu plejers mill-grassroots, u fl-istess ħin niżguraw li l-ewwel tim jibqa’ kompetittiv.”
Otters Waterpolo Club ilu jħarreġ u joħloq plejers kompetittivi f’Għawdex minn meta twaqqaf fl-1981. Il-klabb jinvesti kemm fl-ewwel tim kif ukoll fil-grassroots, sabiex iż-żgħażagħ ikollhom opportunità jilagħbu u jitħarrġu b’mod professjonali. Il-plejers jafu dixxiplina, kooperazzjoni u determinazzjoni, li jgħinhom mhux biss fil-waterpolo iżda fil-ħajja. Il-viżjoni tal-Otters hija li toħloq prodotti u talenti li jirrappreżentaw lil Għawdex u Malta, u biex il-klabb jibqa’ kompetittiv fil-kampjonati Maltin. Il-pixxina ġdida fir-Rabat tgħin ħafna biex it-taħriġ ikun effettiv u ta’ livell internazzjonali.
B’hekk il-klabb ta’ Otters ilu jikkultiva talent għal ħafna snin. L-aħħar staġun kien wieħed memorabbli meta l-klabb wasal sal-finali tal-kampjonat tal-Ewwel Diviżjoni kontra Marsaxlokk, tilfu b’mod ristrett. Skont Paul, suċċess bħal dan ma jkunx possibbli mingħajr investiment fis-suġġett tal-kowċing, inkluż il-ħatra ta’ kowċ barrani Mijatovic, li ħa ħsieb kemm l-ewwel tim kif ukoll iż-żgħażagħ.
“Minn Mejju li għadda bdejna nitħarrġu fil-Pixxina ġdida f’Għawdex,” Paul jispjega. “Qabel kienet kważi impossibbli li nitħarrġu b’mod adegwat. Xi plejers kien ikollhom jivjaġġaw erba’ sigħat biex jaslu għal pixxina adegwata, dik ta’ Tal-Qroqq b’mod speċjali. Issa, bil-faċilitajiet moderni tal-pixxina, il-plejers tagħna jistgħu jitjiebu b’mod sinjifikanti.
L-Under 14 tagħna rebħu l-kampjonat, filwaqt li l-Under 16 rebħu s-sezzjoni tagħhom għall-ewwel darba, u għandna plejers li qed jirrappreżentaw lil Malta fuq livell nazzjonali. Dan kollu jimlini b’sodisfazzjon kbir.”
Il-pixxina ġdida tipprovdi wkoll opportunità kbira biex il-klabb jespandi l-programmi tiegħu lil hinn mill-kompetizzjoni. Paul jispjega, “Issa nistgħu noħolqu sessjonijiet ta’ taħriġ għal kulħadd, minn kampijiet għaż-żgħażagħ sa riabilitazzjoni għall-atleti li għandhom bżonn kura speċjali. Mhux biss li noħolqu plejers kompetittivi, iżda noħolqu wkoll atleti kompluti li huma mħejjija biex jaffaċċjaw sfidi kemm fil-waterpolo kif ukoll fil-ħajja.”
Il-klabb ilu wkoll jieħu sehem fil-kampjonati Maltin mill-1981, u għandu relazzjoni sodisfaċenti mal-ASA u l-President Karl Izzo. “Hemm rispett reċiproku bejn il-klabb u l-ASA. Konna qed nieħdu sehem kontinwament fl-aħħar 40 sena,” jgħid Paul. “M’hemmx sport tim Għawdxi ieħor li żamm tali preżenza fil-kompetizzjoni Maltija bħal Otters. Dan jirrifletti l-impenn tal-plejers u l-management tagħna.”
Is-settur tal-grassroots u l-iżvilupp tat-tfal żgħar huwa essenzjali għal Otters. Paul jenfasizza l-importanza li t-tfal jibdew jilagħbu f’età bikrija: “Il-waterpolo hi logħba iebsa, iżda ladarba tkun mħarreġ tajjeb, hi waħda mill-iktar logħob sodisfaċenti. Tgħallem id-dixxiplina, tipprepara għall-isfidi tal-ħajja u toffri ambjent pożittiv għaż-żgħażagħ.
Logħob kompetittiv fil-kampjonati Maltin jgħin ukoll biex il-plejers jiżviluppaw aktar esperjenza tal-kompetizzjoni u tal-impenn li jeħtieġ biex tirnexxi.”
Bħalissa, il-klabb qed jiffoka fuq il-ħolqien ta’ plejers li jkunu prodotti tal-klabb u li jkunu jistgħu jilagħbu fil-Kampjonat Premier fil-futur. “Irid ikollok finanzjament stabbli u kowċis tajbin biex iżżomm il-progress. Aħna wieħed mill-ftit klabbs f’Għawdex li jinkorporaw investiment fir-reġjun żgħir tagħna, mhux biss fl-ewwel tim, iżda wkoll fil-plejers żgħar,” Paul jenfasizza.
L-effett tal-pixxina ġdida fuq Otters mhuwiex limitat biss għall-prattika. Il-faċilitajiet ġodda joffru opportunitajiet għal taħriġ komprensiv, inkluż żoni terapewtiċi u spazji speċjalizzati li jgħinu lill-plejers itejbu l-prestazzjoni tagħhom. “Il-pixxina ġdida hi dik li l-Ingliżi jsejħulha state-of-the-art, u tagħti opportunità lill-plejers tagħna biex jaqsmu ħiliet, jitjiebu fiżikament u jagħmlu ħiliet teknici li qatt ma setgħu jagħmlu qabel,” jgħid Paul.
L-inawgurazzjoni tal-pixxina kienet ukoll mument li jħossu l-membri kollha tal-klabb bħala wieħeed storiku. Steve Dimech jgħid, “Issa nistgħu naħsbu fil-logħob fuq bażi ta’ home and away, u dan jagħti sens ġdid ta’ responsabbiltà u kburija lil kull plejer u membru tal-klabb.”
Il-viżjoni ta’ Otters u ta’ Paul Dimech hija ċara: tkompli tħarreġ iż-żgħażagħ, żżomm l-ewwel tim kompetittiv, u tinvesti fl-infrastruttura sabiex il-waterpolo f’Għawdex ikompli jikber. Il-Pixxina ġdida f’Għawdex tirrappreżenta opportunità kbira biex it-tfal u l-atleti jipprattikaw b’mod regolari, jingħataw taħriġ ta’ kwalità u jħossu l-entużjażmu li jgħaqqad il-komunità sportiva Għawdxija kollha.
Fil-futur, il-waterpolo f’Għawdex jista’ jħares lejn kompetizzjonijiet nazzjonali u internazzjonali b’aktar plejers ta’ talent, aktar membri kompetittivi u faċilitajiet li joffru ambjent professjonali. B’ħidma kontinwa, dedikazzjoni u viżjoni, Otters Waterpolo u Paul Dimech qed joħolqu l-futur tal-waterpolo Għawdxi u jagħmlu minn Għawdex ċentru ewlieni tal-isport akwatiku f’Malta.
