Il-kollegi players ta’ Cristiano Ronaldo fil-club ta’ Manchester United jinsabu urtati bl-intervista tiegħu ma’ Piers Morgan fuq il-midja soċjali fejn sostnew li naqas li juri rispett lejn il-club, il-players u fuq kollox lejn il-partitarji
Fi stqarrija huma qed jgħidu li ma jistgħux jifhmu kif attakka lill-coach, Erik ten Hag, u lir-reputazzjoni tal-club.
Il-players saru jafu bl-intervista waqt li kienu qed jippreparaw biex itiru lura lejn Manchester mir-rebħa tagħhom ta’ 2-1 fuq Fulham li ntlagħbet f’Londra.
Il-Ħadd filgħaxija ġew imxandra filmati ta’ Ronaldo ma’ Morgan fuq TalkTV. Fl-intervista, Ronaldo akkuża lil Ten Hag u lill-eżekuttivi tal-United li ppruvaw jisfurzawh barra mill-club, u sostna li ‘ma kellhomx empatija’ wara l-mewt tat-tarbija tiegħu fejn saħansitra kkritika lil Wayne Rooney.
Qed jingħad li l-players huma ‘diżappuntati ħafna’ b’dak li qal Ronaldo. Huma jħossu li ma rrispettax lill-club u lill-manager attwali għal mod kif tkellem waqt l-intervista.
Minħabba f’hekk, qed jingħad li United qed jikkunsidraw ‘l-għażliet kollha tagħhom’ fejn jidħol il-futur ta’ Ronaldo f’Old Trafford. Kulħadd fil-club huwa diżappuntat bl-atteġjament tal-internazzjonali Portugiż fejn kien jitqies bħala ikona.
Barra minn hekk huma jħossu li ġie ttrattat b’rispett kbir … anke wara li talab biex jitlaq u wara li rrifjuta li jidħol bħala sostitut kontra Tottenham.
Għalhekk, ma jifhmux għaliex Ronaldo qed iħammeġ ir-reputazzjoni tal-club billi għamel intervista daqshekk kontroversjali.
Huma ddikjaraw ukoll li nhar il-Ħamis li għadda, Ronaldo qalilhom li ma kienx se jkun fil-formazzjoni inizjali kontra Fulham. Anke jekk kien notifikat li kien se jkun fl-iskwadra li kienet se tiffaċċja lil Fulham.
Għalhekk, il-ġerarkija ta’ Manchester United kienet saħansitra aktar frustrata meta l-intervista ħarġet wara l-logħba. Waqt l-intervista, Ronaldo akkuża lil Ten Hag u lill-eżekuttivi tal-United li ppruvaw jisfurzawh barra mill-club.
Il-player ta’ 37 sena stqarr li ma kellu l-ebda rispett lejn il-manager Olandiż u qal li ħassu ttradut mill-club.
Ronaldo akkuża wkoll lil United b’nuqqas ta’ empatija wara li uffiċjali tal-club iddubitaw minnu meta rritorna tard għall-pre-season minħabba l-marda ta’ bintu.
Din l-intervista ġabet ukoll reazzjoni mill-partitarji fejn fuq Twitter kitbu:
“Il-captain tal-Portugall kisser l-istatus tiegħu u biddel Old Trafford f’ċirku.”
“Aktar ma Ronaldo jitlaq malajr, aktar ikun aħjar. X’ċirku ħoloq. Mhuwiex aktar milqugħ f’Old Trafford u t-team ta’ Manchester United ikun aħjar mingħajru.
“Ronaldo ħassar il-legat tiegħu bħala player u persuna. L-egoiżmu tiegħu ħarbat kollox … ħasra li l-karriera tiegħu spiċċat hekk.”
