“Dalgħodu bdejt taħdidiet ma’ Puttinu Cares biex ikunu jistgħu jassistu tfal żgħar Ukreni li għandhom mard relatat mal-onkoloġija.”
Hekk qal il-Prim Ministru Robert Abela waqt li dalgħodu kien qed iwieġeb il-mistoqsijiet tal-ġurnalisti.
“Rigward l-għajnuna li qed nagħtu lill-poplu Ukren, kien hemm 26 persuna li applikaw biex ikollhom stat ta’ refuġjat u qegħdin f’Malta,” qal Dr Abela.
Tkellem ukoll dwar kif pajjiżna se jkun qed jassisti pazjenti li għandhom mard relatat mal-onkoloġija biex jieħdu l-kura f’Malta. Semma wkoll li ntbagħtu tagħmir u provvisti mediċi lejn l-Ukranja.
“Qed ngħinu b’kull mod li huwa possibbli, fil-limitazzjonijiet tagħna, imma definittivament il-prinċipju ta’ solidarjetà mal-poplu Ukren mhux se nillimitawh,” temm jgħid Dr Abela.