Il-Kap tal-Partit Nazzjonalista Alex Borg qal li pajjiżna ma jistax jitkellem dwar futur aħjar jekk ma jindirizzax bis-serjetà l-isfidi li għadhom jaffettwaw lil eluf ta’ nisa kuljum.
F’attività politika organizzata mill-Partit Nazzjonalista f’Jum il-Mara, Dr Borg sostna li meta l-politika tonqos milli tagħti prijorità lill-ugwaljanza u lill-kwalità tal-ħajja tan-nisa, tkun qed tfalli lil nofs il-popolazzjoni.
Għalhekk huwa saħaq li l-Partit Nazzjonalista jinsab determinat li jagħti lin-nisa rwol ċentrali fit-teħid tad-deċiżjonijiet u fit-tfassil tal-politika nazzjonali.
Fid-diskors tiegħu, il-Kap tal-PN tkellem dwar l-isfidi li għadhom iħabbtu wiċċhom magħhom in-nisa fosthom il-vjolenza domestika u d-distakk fil-pagi bejn in-nisa u l-irġiel. Qal li l-PN diġà ressaq proposti ċari f’dan ir-rigward li jinkludu miżuri aktar b’saħħithom kontra l-vjolenza domestika u pjan ambizzjuż biex jittejjeb il-bilanċ bejn ix-xogħol u l-ħajja tal-familja fost oħrajn.
