Il-poplu Malti jibqa’ magħruf bħala poplu li jaf iħenn u jgħin fejn ikun hemm bżonn mhux biss b’mod finanzjarju imma wkoll b’mod materjali. U dan ifakkarna fl-għajnuna kbira umanitarja li membri tal-Protezzjoni Ċivili wettqu missjonijiet f’pajjiżi li kienu milquta minn xi diżastru naturali, bħal nirien, terremot u għargħar. Dan kollu jagħmilna poplu li nafu nkunu solidali ma’ dawk fil-bżonn.
Ma nistgħux iżda ma nsemmux ukoll il-fatt illi Malta ospitat għadd ta’ refuġjati Ukreni li ġew hawn biex ħarbu mill-gwerra kaġun tal-invażjoni Russa. Insemmu wkoll il-persuni midruba fosthom tfal li nġiebu hawn għall-kura ta’ ġrieħi li ġarrbu waqt il-kunflitt f’Gaża.
Fil-fatt, Malta kienet minn tal-ewwel fl-Unjoni Ewropea li sa mill-bidu ta’ din il-gwerra bdiet tilqa’ pazjenti għall-kura fl-isptarijiet Maltin. F’dan l-isfond, ninnutaw ukoll dak li qal il-Prim Ministru Robert Abela nnifsu, li pajjiżna se jibqa’ joffri għajnuna umanitarja, filwaqt li se jkompli jsaħħaħ il-ħidma tiegħu favur il-paċi.
Intant, dan iwassalna wkoll biex insemmu l-għadd kbir ta’ maratoni ta’ ġbir ta’ fondi li jsiru kważi matul is-sena kollha, l-aktar fix-xhur tas-Sajf. Iżda bl-akbar waħda tkun fl-Istrina bil-ġbir imorru kollu għall-Malta Community Chest Fund. Ġir li llum qed ilaħħaq għal miljuni.
Mhux dan biss, imma jsiru wkoll ġbir mill-partiti politiċi u bosta għaqdiet oħra mhux governattivi, bħalma huma l-Caritas, l-Inspire, il-Hospice u d-Dar tal-Providenza. Dan kollu huwa sewwa li jsir imma xorta jqanqal il-mistoqsija ta’ kemm il-Maltin jifilħu jagħtu f’dawn il-maratoni. Anke minkejja li l-Gvern permezz tal-Fondi għall-Kawżi Soċjali jikkontribwixxi wkoll għal dan il-għan.
Il-maratoni ma jsirux biss għal dawk il-Maltin li jkunu fil-bżonn imma wkoll imorru lil hinn minn xtutna f’maratoni sabiex jinbnew skejjel, sptarijiet u anke ġwiebi tal-ilma f’pajjiżi foqra l-aktar fl-Afrika u l-Amerika Latina.
Għalhekk, id-donazzjonijiet li jsiru f’dawn il-maratoni huma xhieda oħra ta’ kemm il-poplu Malti huwa ġeneruż u solidali, li lest jagħti ftit minn dak li għandu biex jgħin lil ħaddieħor. Fuq kollox, dawn ikunu okkażjonijiet fejn bħala poplu ningħaqdu sabiex nagħtu ħajja aħjar lil dawk li x-xorti ma tantx tbissmitilhom.