Il-Premier League aċċetta li jiltaqa’ ma’ Amnesty International għal taħditiet dwar test rivedut tas-sidien u d-diretturi wara t-teħid ta’ Newcastle United appoġġat mill-Arabja Sawdija.
Amnesty kitbet lill-kap eżekuttiv tal-Premier League, Richard Masters (ritratt), wara li t-teħid tal-kontroll seħħ tliet ġimgħat ilu fejn talbet li r-regoli jinkludu ksur tad-drittijiet tal-bniedem.
Preċedentement enfasizzat kif l- Arabja Sawdija għandha rekord “tal-biża’” dwar il-kwistjoni u tgħid li r-regoli dwar is-sjieda tal-clubs huma “inadegwati ħafna”.
Iżda l-Premier League jgħid li għandu “assigurazzjonijiet li jorbtu legalment” li l-Fond ta’ Investiment Pubbliku (PIF) tal-pajjiż għandu kontroll ta’ 80% tal-club, mhux tal-istat Sawdi, minkejja li l-Prinċep tal-Kuruna, Mohammed bin Salman, huwa wkoll il-president tal-PIF.
Huwa mifhum li l-Premier League lest li jisma’ t-tħassib ta’ Amnesty u se jagħmel reviżjoni tat-test tas-sidien u d-diretturi tiegħu kif jagħmel spiss wara teħid.
It-test jevalwa jekk seħħitx xi attivitá kriminali minn sidien prospettivi, iżda bħalissa ma jsemmix speċifikament l-allegazzjonijiet tad-drittijiet tal-bniedem f’dan.
Sacha Deshmukh, il-kap eżekuttiv interim ta’ Amnesty International UK, qal: “Ovvjament ninsabu kuntenti li l-Premier League lest jitkellem dwar dawn il-proposti bħala punt tat-tluq għal dak li nittamaw li jkun proċess li jwassal għal tisħiħ konsiderevoli tar-regoli dwar governanza tal-football.
“Ir-regoli attwali dwar min jippossjedi u jmexxi clubs tal-football Ingliż huma sfortunatament inadegwati, mingħajr ebda limitu ta’ sjieda għal dawk li huma kompliċi f’atti ta’ tortura, skjavitù, traffikar tal-bnedmin jew saħansitra delitti tal-gwerra.
“Aħna ħerqana li niddiskutu ma’ Richard Masters l-ideat tagħna għal test tas-Sidien u tad-Diretturi li jkun konformi mad-drittijiet tal-bniedem kif ukoll jgħin biex ineħħu s-sidien mhux addattati kompliċi fi ksur tad-drittijiet tal-bniedem, kif ukoll inaqqas il-ħasil tal-isports u ġeneralment itejjeb il-governanza fil-logħba.”
