Il-President ta’ Malta George Vella u l-President tal-Kroazja Zoran Milanović ikkonfermaw ir-relazzjonijiet bilaterali eċċellenti bejn iż-żewġ pajjiżi.
Wara ċ-ċerimonja uffiċjali ta’ merħba fi Pjazza San Ġorġ, il-Belt Valletta, il-President Vella u l-President Milanović kellhom taħdita privata, segwita minn laqgħa bilaterali bejn id-delegazzjonijiet uffiċjali ta’ Malta u l-Kroazja fis-Sala tal-Arazzi fil-Palazz tal-Gran Mastru. Id-diskussjonijiet iffukaw fuq ir-relazzjonijiet bilaterali bejn iż-żewġ pajjiżi, is-sitwazzjoni fl-Ukrajna, l-isfidi attwali li qed jiffaċċja r-reġjun tal-Mediterran, it-tkabbir tal-Unjoni Ewropea u l-Konferenza dwar il-Futur tal-Ewropa.
Il-President Vella u l-President Milanović laqgħu l-firxa u l-frekwenza tal-iskambji fil-livelli kollha, li rriżultaw fi progress fl-oqsma politiċi, ekonomiċi u kulturali.
Fl-indirizz lill-ġurnalisti flimkien mal-President Milanović, il-President Vella qal li Malta tħares b’mod pożittiv ħafna lejn il-progress li għamlet il-Kroazja biex tissodisfa l-kriterji biex tidħol fiż-żona tal-ewro u jħeġġeġ aktar riformi fit-triq tagħha biex issir membru taż-żona Schengen, hekk kif dan jiffaċilita aktar relazzjonijiet bilaterali bejn Malta u l-Kroazja, u aktar turiżmu. Fir-rigward tal-aħħar żviluppi dwar il-Konferenza dwar il-Futur tal-Ewropa, il-President Vella enfasizza l-importanza li ċ-ċittadin jibqa’ fiċ-ċentru tal-proċess. Huwa esprima t-tama tiegħu għal Unjoni Ewropea attiva fir-rigward tal-kwistjonijiet reġjonali u internazzjonali.
Waqt it-taħditiet, il-President Vella tenna wkoll l-appoġġ u l-impenn qawwi ta’ Malta għall-prospetti Ewropej tar-reġjun tal-Balkani tal-Punent. Mal-President Milanović, il-President elabora dwar il-konvinzjoni tiegħu li post il-Balkani tal-Punent huwa fl-Unjoni Ewropea bħala stati membri sħaħ. Dwar il-gwerra fl-Ukrajna, iż-żewġ presidenti qasmu fehmiet dwar kif l-invażjoni mir-Russja – l-istabbiltà globali, il-kummerċ internazzjonali, is-sorsi tal-enerġija u anke kkawżat nuqqas ta’ ikel.
Fil-konferenza tal-aħbarijiet, il-President Milanović tkellem dwar id-dħul tal-Kroazja fiż-żona tal-ewro, u l-interess tagħha li tidħol fiż-żona Schengen sabiex jiġi ffaċilitat iċ-ċaqliq tal-persuni u tingħata spinta lill-ekonomija tat-turiżmu. Il-President tal-Kroazja tkellem ukoll dwar il-mod kif l-iżviluppi fil-Bożnija Ħerzegovina qed ikollhom effett dirett fuq pajjiżu.
Il-President ta’ Malta tenna l-istedina tiegħu lill-President Milanović biex jipparteċipa fil-Laqgħa tal-Arraiolos fis-6 ta’ Ottubru.