ll-proġetti tal-Malta Football Association biex jagħtu spinta lil-livell tekniku tal-football Malti, iżidu l-parteċipazzjoni tal-poplu u jinvestu fil-kostruzzjoni ta’ faċilitajiet ġodda u r-rinovazzjoni ta’ dawk eżistenti, kienu fuq l-aġenda waqt iż-żjara tal-president tal-UEFA Aleksander Ceferin nhar l-Erbgħa fil-għaxija.
Ceferin, li għamel l-ewwel żjara uffiċjali tiegħu f’Malta mill-elezzjoni tiegħu bħala President tal-UEFA fl-2016, kellu laqgħa mal-Prim Ministru, Robert Abela, u s-Segretarju Parlamentari għall-Isport, Clifton Grima, fil-Berġa ta’ Kastilja.
Din kienet segwita bi żjara fil-Kumpless tal-MFA f’Ta’ Qali fejn il-President tal-UEFA kellu taħdidiet mal-President tal-MFA, Bjorn Vassallo, u l-ogħla uffiċjali tal-Assoċjazzjoni.
Id-diskussjoni mal-Prim Ministru ffukat fuq l-isforzi konġunti tal-Gvern Malti u l-MFA biex tirranġa l-infrastruttura tal-football lokali, kemm fil-livell nazzjonali kif ukoll fil-livell tal-clubs, it-tħejjijiet għall-Kampjonat tal-UEFA Under-19 fl-2023, li se jsir f’Malta, u aktar opportunitajiet biex torganizza avvenimenti oħra importanti tal-UEFA fil-futur qrib.
Il-grounds rinnovati fil-Kumpless tal-Football tal-MFA, li tlestew bi spiża stmata ta’ aktar minn €2 miljuni, se jkunu kkumplimentati bil-kostruzzjoni ta’ Ċentru Nazzjonali tal-Football ġdid mill-isbaħ, li jinkorpora stadium tal-Kategorija 1 tal-UEFA, fil-ħin għall-Kampjonati tal-UEFA U-19. Dan il-proġett qed jiġi kofinanzjat mill-Assoċjazzjoni u l-Gvern ta’ Malta.
Waqt li tkellem mal-media wara li inawgura l-grounds rinnovati tat-taħriġ, Cefeein esprima ġieħ lill-isforz kontinwu tal-MFA biex ittejjeb l-infrastruttura tal-football, waqt li enfasizza l-importanza tal-investiment fil-football għall-benefiċċji multipli tagħha, inkluż il-promozzjoni tal-ħbiberija u l-edukazzjoni. fost it-tfal.
L-importanza tal-promozzjoni tal-football fl-iskejjel ġiet diskussa wkoll waqt il-laqgħa mal-Prim Ministru fid-dawl tal-programm Football In Schools, proġett ġdid li qed jitwettaq mill-MFA b’kollaborazzjoni mal-Ministeru tal-Edukazzjoni.
Min-naħa tiegħu, is-Sur Vassallo tenna l-impenn tal-Assoċjazzjoni lejn l-implimentazzjoni tal-inizjattivi ewlenin inklużi fl-istrateġija mnedija dan l-aħħar. Huwa esprima l-gratitudni tal-Assoċjazzjoni lejn il-UEFA għall-appoġġ tagħha, speċjalment permezz tal-programm UEFA HatTrick, li huwa vitali għall-MFA mhux biss biex issostni lilha nnifisha iżda biex timplimenta proġetti importanti għal aktar żvilupp tal-football Malti.
Matul iż-żjara tiegħu fil-Kumpless tal- Football tal-MFA, il-President tal-UEFA ltaqa’ mal-membri tal-iskwadra ta’ Malta ta’ Taħt is-16-il sena u dawk tal-Akkademja tal-Bniet tal-Assoċjazzjoni li kienu qed jitħarrġu fil-grounds rinnovati.
Aktar tard fil-għaxija, Ceferin segwa l-partita tar-round ta’ kwalifikazzjoni għat-Tazza tad-Dinja bejn Malta u Ċipru fejn ħriġna rebbieħa bl-iskor ta’ 3-0.
