Il-kunflitt fil-Golf Għarbi kellu żvolta mill-aktar negattiva ħafna fl-aħħar sigħat u dan hekk kif wara li kienet attakkat infrastruttura tal-gass fl-Iran, saret ritaljazzjoni qawwija mill-Iran u ġie attakkat l-akbar terminal tal-gass fid-dinja li hu dak tal-Qatar.
Kif mistenni f’sitwazzjonijiet bħal f’dawn l-attakki li seħħew, kemm minn naħa u komm minn naħa oħra fuq infrastruttura marbuta mal-gass, wasslet biex il-prezz taż-żejt kompla tiela’ ‘lfuq u nhar l-Erbgħa kien ta’ $110-il barmil. Ta’ min jgħid li waqt li l-prezz taż-żejt kien laħaq il-$110-il barmil, xahar ilu l-prezz kien ta’ $68-il barmil, waqt li sena ilu kien ta’ $71-il barmil. Wara li kien attakkat l-akbar terminal tal-gass f’Ras Laffan il-Qatar keċċa lill-attachés militari u tas-sigurtà tal-Iran.
Filfatt il-Qatar iddikjara lill-attachés militari u tas-sigurtà tal-Iran bħala “persona non grata” llum u ordnalhom jitilqu fi żmien 24 siegħa, filwaqt li kkwota dak li ddeskriva bħala attakki Iranjani ripetuti bħala ksur tas-sovranità tiegħu.
Fi stqarrija llum, il-Ministeru għall-Affarijiet Barranin tal-Qatar qal li wassal nota uffiċjali lill-Ambaxxata Iranjana f’Doha li tinformah li l-attaché militari u l-attaché tas-sigurtà — flimkien mal-persunal li jaħdem fl-uffiċċji tagħhom — iridu jitilqu mill-pajjiż.
Il-ministeru qal li l-mossa kienet bi tweġiba għat-theddid ripetut tal-Iran u l-aggressjoni sfaċċata kontra l-istat tal-Qatar.” Wissa lill-Iran biex ma jkomplix b’din l-attitudni ostili tiegħu. Is-sit ta’ Ras Laffan fil-Qatar ġie attakkat wara li Tehran akkuża lill-Istati Uniti u lil Iżrael li qed jattakkaw faċilitajiet Iranjani taż-żejt.
Il-prezzijiet globali taż-żejt żdiedu l-Erbgħa, u laħqu l-$110 kull barmil, hekk kif attakki fuq l-infrastruttura tal-enerġija madwar il-Lvant Nofsani ħasdu s-swieq, u għelbu l-isforzi tal-White House biex ittaffi t-tħassib dwar iż-żieda fil-prezzijiet tal-enerġija.
Iż-żejt mhux raffinat Brent, il-punt ta’ riferiment globali taż-żejt, tela’ sa $110.90 kull barmil u ż-żejt mhux raffinat tal-Istati Uniti laħaq id-$99.78 kull barmil wara rapporti li l-Iran kien attakka l-infrastruttura tal-enerġija. Ġew irrappurtati nirien f’faċilitajiet ewlenin fil-Qatar u ġew interċettati theddid mill-ajru fl-Għarabja Sawdija, wara twissija mill-Korp tal-Gwardja Rivoluzzjonarja Iżlamika tal-Iran.