Il-Prim Ministru Robert Abela, żar iċ-Ċentru tar-Riabilitazzjoni Komunità Santa Marija li l-Aġenzija Sedqa għandha f’Ħal Farruġ fejn hemmhekk ingħaqad ukoll mar-residenti għal ikla organizzata minnhom stess flimkien mal-ħaddiema ta’ din il-komunità.
Flimkien mal-Ministru għall-Politika Soċjali u d-Drittijiet tat-Tfal Michael Falzon, u mal-Kap Eżekuttiv tal-Fondazzjoni għas-Servizzi ta’ Ħarsien Soċjali (FSWS) Alfred Grixti, il-Prim Ministru ltaqa’ mar-residenti li ħejjew dak kollu li kien meħtieġ għal din l-ikla, fejn għamlu użu minn frott u ħaxix li jkabbru huma stess fl-għelieqi ta’ madwar ir-residenza.
Waqt din l-ikla, il-Prim Ministru tkellem mar-residenti, hekk kif qasmu l-esperjenzi tagħhom, kemm dawk ta’ sfida iżda fuq kollox dawk ta’ tama. Sema’ wkoll stejjer ta’ residenti li għaddew minn dan il-programm, temmewh b’suċċess, u llum qed jagħtu lura lill-komunità billi jgħinu lill-oħrajn fil-vjaġġ tagħhom lejn il-fejqan.
Filwaqt li rringrazzja lir-residenti tax-xogħol li sar biex tittella’ din l-ikla, il-Prim Ministru Abela faħħarhom tal-kuraġġ li kellhom biex qasmu miegħu l-esperjenzi personali tagħhom. “Kull persuna tista’ tiżbalja, importanti nifhmu dan. Iżda trid kuraġġ kbir biex tagħraf l-iżball, taċċettah u taħdem bla waqfien biex tirkupra u terġa’ tibni ħajtek mill-ġdid. U dan qed tagħmluh b’dinjità u b’determinazzjoni li għandu jispira lil ħafna oħrajn,” sostna Dr Abela.
Il-Prim Ministru rrikonoxxa wkoll ix-xogħol imprezzabbli tal-ħaddiema fil-Komunità Santa Marija. “Intom mhux sempliċiment professjonisti, intom nies b’qalb kbira li temmnu fil-bidla u temmnu fin-nies. Lil kull resident hawnhekk ngħidilkom li dawn il-ħaddiema jemmnu fikom u qegħdin hawn biex jgħinukom tirnexxu. Bħala Gvern se nibqgħu naħdmu biex noffru s-sapport meħtieġ biex kull min irid jagħmel bidla f’ħajtu, ikollu l-għodod u ċ-ċans jagħmilha,” temm jgħid Dr Abela.
Id-Direttur tal-Operat ta’ Aġenzija Sedqa, Charles Scerri, spjega wkoll kif ir-residenti issa għandhom l-opportunità li jaqsmu l-esperjenzi tagħhom ma’ tfal u żgħażagħ permezz tal-programm ‘Hurt by others. Healed through others’. Dan il-programm, li jingħata fiċ-Ċentri ta’ Tagħlim fl-ibliet u rħula, joffri spazju lir-residenti sabiex jitkellmu dwar dak li għaddew minnu filwaqt li jaqsmu tagħlim tal-ħajja inkluż reżiljenza u modi differenti ta’ kif tista’ tgħix ħajja aħjar.
Il-Komunità Santa Marija toffri programm ibbażat fuq komunità terapewtika, li jinkludi fażijiet residenzjali u ta’ aftercare, sabiex jiġu offruti għodod konkreti għal ħajja mingħajr riskju ta’ vizzju u aktar b’saħħitha.