Il-Prim Ministru u Mexxej tal-Partit Laburista Robert Abela qal li l-ekonomija u l-politika progressiva huma l-għanijiet ewlenin tal-Partit Laburista; u li l-partiti soċjalisti huma l-vuċi ta’ kulħadd. Meta kien qed jindirizza l-ftuħ tal-Kunsill ta’ Socialist International li qed jitlaqqa’ bħalissa f’Malta, Dr Abela qal li meta l-partit soċjalisti jkunu magħqudin ikunu b’saħħithom u meta jitkellmu f’isem kulħadd ikunu ta’ suċċess.
Il-Prim Ministru sostna li biex ikollna futur b’saħħtu jrid ikollna ekonomija b’saħħitha. Qal li f’Malta, il-Budget 2026 huwa mibni fuq viżjoni ċara, li tissaħħaħ il-fibra soċjali, filwaqt li nippreparaw l-ekonomija għall-futur. Semma l-miżuri soċjali li tħabbru fil-Budget għas-sena d-dieħla u l-investiment fl-AI. Spjega li kull miżura tal-Budget għandha rwol vitali u jħarsu l-valuri ewlenin tagħna li huma l-ġustizzja soċjali, l-opportunitajiet għall-familji, it-tkabbir ekonomiku li jiddakkar b’xogħol dinjituż u l-avvanz teknoloġiku.
Tkellem dwar l-importanza tal-paċi, li qal hija importanti daqs il-prosperità. Spjega kif kull ċittadin jgħix aħjar f’dinja mingħajr gwerer. Dr Abela qal li għalkemm Malta pajjiż newtrali, dan ma jfissirx li aħna newtrali fejn jidħlu l-inġustizzji. Sostna li dan ifisser li aħna promoturi tal-paċi, medjaturi, u favur id-djalogu, bi rwol importanti fejn tidħol l-azzjoni umanitarja. Qa li hu u l-Partit Laburista Malti lesti jaħdmu f’din il-missjoni vitali.
Il-President ta’ Socialist International u Prim Ministru Spanjol Pedro Sanchez qal li Socialist International kburija li qed taħdem ma’ Gvern Laburista, bil-laqgħa f’Malta ddeskriviha bħala simbolika, li permezz tagħha tikkonferma l-impenn biex jissaħħu il-Gvernijiet progressivi. Żied jgħid li s-Soċjalisti għandhom l-għan li jsaħħu l-vuċi tan-nies u jwettqu l-ħolm u l-aspirazzjonijiet tagħhom. Filwaqt li rrikonoxxa d-diversi sfidi li għandhom il-pajjiżi madwar id-dinja, madanakollu saħaq li x-xellug huwa l-kumpass, li jipponta għall-ugwaljanza, id-dinjità u l-ġustizzja. Temm jgħid li flimkien nirbħu mhux biss l-elezzjonijiet, iżda wkoll il-futur li rridu għal uliedna u wlied uliedna.
Indirizza wkoll il-Kunsill tal-partiti soċjalisti, id-Deputat Prim Ministru Ian Borg li t-tema hija f’waqtha ‘Leading Together’ (Immexxu Flimkien) għax flimkien nistgħu nibnu futur mibni fuq id-dinjità, il-properità u l-paċi. Saħaq li jeħtieġ ħidma flimkien biex nipproteġu l-istituzzjonijiet demokratiċi, nikkumbattu l-inugwalojanza u nipproteġu d-drittijiet tal-bniedem. Qal li l-isfidi jkunu iktar faċli jingħelbu meta niffaċċjawhom flimkien bħala partiti soċjalisti. Temm jgħid li mid-diskussjonijiet li qed isiru f’dawn il-jumejn se ssir ħidma għal futur aħjar.
Fi tmiem id-diskorsi, il-Palestinjan Rawhi Fattouh u l-Iżraeljana Colette Aviatal ġew ippremjati bl-unur Pena Gomez mill-Prim Ministru Robert Abela u l-President ta’ Socialist International Pedro Sanchez.
