Il-Prim Ministru Robert Abela llum żar it-timijiet kreattivi ta’ żewġ studios lokali li ħolqu l-esperjenza immersiva tal-Viżjoni Malta 2050.
L-esperjenza immersiva – l-ewwel waħda tax-xorta tagħha f’Malta – ser tkun qed tintwera f’installazzjoni artistika mibnija apposta fid-daħla tal-Belt Valletta. Din ser tilqa’ l-pubbliku inġenerali u tispjega aħjar il-Viżjoni nazzjonali għal Malta għall-25 sena li ġejjin.
Dan ser isir permezz ta’ rakkonti ċinematografiku u elementi awdjoviżivi sinkronizzati bir-reqqa. Fih wieħed ser jara proġezzjonijiet kbar, sekwenzi animati, dawl atmosferiku, flimkien ma’ mużika u narrazzjoni li jibdlu l-post fiżiku f’kanvas.
Matul iż-żjara, it-timijiet urew lill-Prim Ministru partijiet mix-xogħlijiet li ħadmu fuqhom – sekwenzi ewlenin li jirriflettu d-dettall u l-ambizzjoni tal-proġett.
Fuq quddiem nett tal-iżvilupp viżiv u ċinematografiku hemm Stargate Studios, studjo lokali tal-produzzjoni tal-films, li qed imexxi l-ħolqien u l-integrazzjoni tas-sekwenzi animati tal-proġett.
Magħhom jidħol ix-xogħol ta’ Elton Zarb u Kevin Abela, professjonisti tal-kompożizzjoni tal-mużika li jikkumplimentaw id-dimensjoni viżiva b’dik tal-ħoss: fejn mużika oriġinali u n-narrattiva mitkellma jiġu flimkien.
L-esperjenza immersiva se tkun miftuħa għall-pubbliku fil-ġimgħat li ġejjin wara l-avveniment uffiċjali ta’ tnedija tal-Viżjoni Malta 2050 li se jsir fi Pjazza Tritoni fis-27 ta’ Frar.