Minn Cristian Muscat
Kif bdiet l-imħabba tiegħek lejn il-futbol?
Meta kont għadni żgħir konna nilagħbu l-futbol fit-toroq. Kien meta kelli 12-il sena li bdejt niffrekwenta futboġ organizzat. Apparti l-immaginazzjonijiet u l-ħolm tat-tfulija li kelli, logħba li kienet għamlitni nhobb dan l-isport ukoll kienet is-Subbuteo. F’moħħi kont nilgħab ir-rwol li nipprepara t-tim tiegħi għal-logħbiet li kont nilgħab kontra tfal oħra. Tista’ tgħid li l-imħabba għall-kowċing u t-taħriġ bdiet hawn billi niddisinja eżerċizzi u programmi tat-taħriġ. Ma jistax jonqos ukoll il-cartoons Holly e Benji, li tista’ tgħid ħafna tal-etá tagħna kienu jsegwu.
Iddeskrivi l-esperjenzi preżenti tiegħek bħala assistant coach ta’ Vittoriosa Stars FC, fejn taħdem spalla ma’ spalla mal-kowċ, Jason Camenzuli.
Din se tkun ir-raba’ sena li se naħdem mal-kowċ Jason Camenzuli fis-settur tal-kbar. Fil-passat kelli wkoll esperjenza naħdem miegħu fuq livell ta’ nursery. Nista’ ngħid li għandna relazzjoni tajba ħafna fejn dejjem nitgħallmu mingħand xulxin. Il-Kowċ Jason huwa kowċ tal-affari tiegħu u verament jaf imur ħafna mal-plejers, mal-kumitat, u anke magħna l-membri tat-tim tekniku. Naqblu ħafna meta naħdmu flimkien, fejn għandna ideat komuni kemm bħala metodoloġija tat-taħriġ kif ukoll bħala stil ta’ logħob. Jien iffukat l-aktar fuq l-aspett fiżiku, filwaqt li l-kowċ Jason huwa responsabbli aktar fuq it-tattika. Dejjem niddiskutu flimkien sabiex naraw liema huma l-aħjar mezzi kif dak li jkun hemm bżonn jiġi applikat fit-taħriġ.
X’tikkummenta fuq l-andament tat-tim matul l-istaġun li għadda, fejn ksibtu l-promozzjoni għaċ-Challenge League min-National Amateur League 1?
L-aktar pedina importanti li kellna fit-tim is-sena l-oħra kienet l-għaqda. Kull fejn kien kowċ Jason l-ewwel pass fundamentali kien li jgħaqqad it-tim. Ma nistgħux ma nsemmux ukoll il-membri tal-kumitat, li ħadmu verament b’mod professjonali, fejn raw il-bżonn li jingaġġaw plejers li jkollhom livell tajjeb, peró jkunu wkoll plejers li jilagħbu mill-qalb għat-tim.
X’tikkummenta fuq il-livell tal-futbol Malti fil-preżent?
Fil-fehma tiegħi il-livell tal-futbol Malti avvanza xi ftit speċjalment f’ċerti wirjiet li ta t-tim nazzjonali. Imma, baqa’ ħafna aktar xogħol xi jsir sabiex inkunu nistgħu nimxu aktar ‘il quddiem. Hawn żgħażagħ b’talent naturali li għandhom il-kapaċitá li jirnexxu sew f’dan l-isport. Nisperaw f’Alla li jingħataw l-opportunitajiet sabiex juru l-ħiliet tagħhom u jingħataw gwida professjonali ta’ kif għandhom iġibu ruħhom sabiex jagħmlu passi pożittivi fil-karriera tagħhom.
U dak tar-riżorsi (grawnds) fejn titħarrġu u tilagħbu l-logħob kompetittiv tagħkom?
Ovvjament dan huwa suġġett delikat u importantissimu. L-art tilgħab rwol importanti ħafna kemm biex ikollok taħriġ u logħob ta’ livell, kif ukoll sabiex innaqqsu r-riskju ta’ plajers li jistgħu isofru minn xi injury. L-art tal-grawnd ta’ fejn nittrenjaw aħna, li hija tal-Kullegg De La Salle, din is-sena ġiet rinnovata. Il-faċilitajiet f’dan l-istabbiliment huma ta’ livell għoli fejn issib ukoll grawnd ieħor ta’ daqs ta’ 7-a-side fejn l-art tiegħu hija sintetika u f’kundizzjoni tajba għat-taħriġ. Insibu ukoll gym għad-dispożizzjoni tal-plejers tagħna. Din is-sena, il-logħob kompetittiv tagħna se jkun fis-Centenary Stadium u l-Victor Tedesco Stadium. L-art ta’ dawn iż-żewġ grawnds hija prattikament ġdida u se tkun tajba għal-logħob tal-kampjonat li jmiss taċ-Challenge League.
Kif qed tħares lejn il-futur tiegħek fil-futbol?
Il-promozzjoni li ksibna l-istaġun li għadda mlietni b’kuraġġ sabiex inkompli ninvesti aktar f’dan ix-xogħol. Hija l-mira tagħna bħala klabb li fil-futur qrib ikollna promozzjoni oħra għall-ahjar livell li joffri l-futbol Malti. Mil-lat personali għalissa nixtieq inkompli naħdem u nibni fuq il-ħiliet tiegħi fis-settur tal-fitness and performance fil-futbol. Għamilt kważi 20 sena naħdem fis-settur taż-żgħażagħ u hija prattikament esperjenza tista’ tgħid ġdida għalija fis-settur tal-kbar.
Għaddi messaġġ finali lil min jixtieq jagħmel karriera ta’ suċċess fil-futbol.
Importanti li dak li jkun jieħu gost bix-xogħol u l-progress li jkun qed jagħmel. Li tagħmel ix-xogħol għal qalbek huwa ingredjent importanti sabiex tkabbar il-kurjożitá u l-għatx biex tkompli titgħallem. Fil-ħajja titgħallem kuljum u dejjem hemm spazju għall-avvanz. Dan l-avvanz jiġi biss b’dedikazzjoni u b’attitudni pożittiva. Dejjem irridu nżommu f’moħħna li t-triq fiha ħafna ostakli, u permezz ta’ dawn l-ostakli aħna dejjem intejbu l-livell tagħna!