Dejta estratta mill-apparat elettroniku ta’ Yorgen Fenech tat lill-pulizija xejriet ġodda fuq persuni li jistgħu jkunu marbuta mal-qtil ta’ Daphne Caruana Galizia.
Dan ħareġ mix-xhieda tas-Supretendent Keith Arnaud fl-inkjesta pubblika li għaddejja b’rabta ma’ dan id-delitt.
Fis-seduta tal-bieraħ, Arnaud qal li dejta estratta mill-Europol mill-apparat elettroniku ta’ Fenech dalwaqt se tiġi ppreżentata bħala evidenza fil-kumpilazzjoni kontra s-suspettat fil-qtil.
Huwa qal li d-dejta, li qed tiġi analizzata mill-pulizija Maltija u l-Europol, tista’ tgħin biex tifhem ċerti aspetti tar-reat.
Mistoqsi mill-Prim Imħallef Emeritu Joseph Said Pullicino jekk id-dejta wasslitx għal żviluppi ġodda, minbarra dawk marbuta ma’ persuni diġà arrestati, Arnaud wieġeb: “Hemm żviluppi ġodda li jistgħu jwasslu għal nies oħrar li b’xi mod setgħu kienu involuti fil-qtil. Mhux neċessarjament tikkonċerna lil nies magħrufa fl-investigazzjoni sa issa.”
L-inkjesta pubblika dwar il-qtil ta’ Caruana Galizia hija inkarigata, fost affarijiet oħra, biex tiddetermina jekk l-Istat għamilx dak kollu li seta’ biex il-qtil ma’ jseħħx.
L-inkjesta hija mmexxija mill-Imħallef irtirat Michael Mallia, l-eks Prim Imħallef Joseph Said Pullicino u l-Imħallef Abigail Lofaro.
