Il-Pulizija Metropolitana nediet formalment investigazzjoni kriminali dwar allegazzjonijiet li Peter Mandelson illikja emails ta’ Downing Street u informazzjoni sensittiva lil Jeffrey Epstein.
Dokumenti mill-Epstein files li ġew ippubblikati fl-aħħar jiem juru li dak li kien is-segretarju tan-negozju allegatament kien bagħat dettalji dwar diskussjonijet interni lil Epstein, li llum huwa mejjet.
Din l-aħbar qanqlet reazzjoni kbira madwar l-ispettru politiku, inkluż Gordon Brown li fiż-żmien meta seħħ l-allegat ksur huwa kien Prim Ministru.
Huwa mistenni li l-investigaturi jinterrogaw lil Mandelson u jitolbu aċċess għall-apparati elettroniċi tiegħu, kif ukoll jieħdu stqarrijiet mingħand diversi persuni oħra, inkluż uffiċjali ċivili għolja.
Ġie rrapportat li t-Tlieta filgħaxija, Scotland Yard ikkonfermat li Mandelson kien qed jiġi investigat fuq suspett ta’ mġiba ħażina f’kariga pubblika, reat li ntqal li jġorr piena massima ta’ priġunerija ta’ għomor ħabs.
Fi stqarrija, il-Kmandant Ella Marriott mill-Pulizja Metropolitana qalet: “Wara r-rilaxx ulterjuri ta’ miljuni ta’ dokumenti tal-Qorti relatati ma’ Jeffrey Epstein mid-Dipartiment tal-Ġustizzja tal-Istati Uniti, il-Met irċeviet numru ta’ rapporti dwar allegata mġiba ħażina f’kariga pubblika, inkluż riferiment mill-Gvern tar-Renju Unit.
“Nista’ nikkonferma li l-Pulizija Metropolitana issa nediet investigazzjoni dwar raġel ta’ 72 sena, eks ministru tal-gvern, fuq reati ta’ mġiba ħażina f’kariga pubblika.
“Il-Met se tkompli tevalwa l-informazzjoni rilevanti kollha li tasal għandna bħala parti minn din l-investigazzjoni u mhux se tagħti aktar kummenti f’dan l-istadju.”