Il-Pulizija qed jinvestigaw allegazzjonijiet li saru minn omm li qalet li uffiċjali tal-pulizija sawtu lil binha talli ma kienx liebes maskra.
F’kumment fuq il-midja soċjali akkumpanjat b’ritratt, Simone Camilleri qalet li uffiċjali tal-pulizija stazzonati Paceville ilbieraħ tefgħu lil binha mal-art, u anke allegat li wara li daħħluh f’vann użaw il-vjolenza għax ma kienx liebes maskra.
Tenniet li hija taqbel mal-ħlas ta’ multa f’dan ir-rigward, iżda ma taqbilx mal-użu tal-vjolenza.
Hija appellat lil kull min jista’ biex jagħmel kuntatt magħha u inkoraġġiet lin-nies biex ixerrdu l-messaġġ tagħha.
Intant meta kkuntattjati dwar dan, il-Pulizija qalet li l-allegazzjonijiet qed jiġu investigati.
