Puttinu Cares qed jappellaw biex kulħadd joffri talba għal Emily li llum se terġa’ tagħmel operazzjoni oħra minħabba li kien hemm kumplikazzjonijiet oħra.
Ftit tal-ġimgħat ilu ċ-ċkejkna Emily, li għandha sena u erba’ xhur, għamlet operazzjoni twila ta’ madwar 10 sigħat biex ineħħulha tumur. Minkejja li tħabbar li l-operazzjoni kienet suċċess iktar milli ħasbu, fejn irnexxielhom ineħħu 95% mit-tumur u salvawlha l-kilwa, hija baqgħet l-isptar tirkupra u għad fadlilha triq twila.
Matul dawn l-aħħar ġimgħat rajna diversi inizjattivi biex kulħadd jingħaqad flimkien biex jitlob għal din iċ-ċkejkna. Minkejja t-tbatija kbira li għaddejja minnha ommha, Vanessa Gatt, xtaqet tagħti rigal lil Puttinu f’għeluq sninha. Fil-fatt hija ġabret ‘il fuq minn €4000 li se jmorru bħala donazzjoni lil Puttinu li tant għenuha.
