Illum, fil-Port il-Kbir issir ir-Regatta tal-Vitorja hekk kif l-interess qed jerġa’ jikber għal dawn it-tiġrijiet tradizzjonali.
Bħas-soltu, ir-Regatta se tkun maqsuma f’żewġ kategoriji – dik Open u dik “B”. Dan l-avveniment jiftaħ bit-tiġrija tal-frejgatini tan-nisa.
L-aħħar edizzjoni, l-Aggregate Shield ġiet mirbuħa mill-Birgu wara li sentejn ilu kienu rebħuha flimkien ma’ Bormla meta kisbu punti ndaqs.
Dan ifisser li s-sena li għaddiet kien it-tielet suċċess għall-Ġirbin li wasal wara 40 sena li rebħu l-Aggregate Shield waħedhom, jiġifieri, fl-1984 … meta kienu kisbu wkoll il-monopolju ta’ Bormla li kienu ġejjin minn sitt rebħiet konsekuttivi, bejn l-1978 u l-1983.
Ir-Regatta tas-sena li għaddiet kellha tmiem mill-aktar eċċitanti meta l-Birgu rebħu l-aħħar tiġrija, dik tal-tal-Pass ta’ b’Erbgħa, biex proprju qabżu lill-favoriti, l-Isla, fil-klassifika finali b’żewġ punti.
Kategorija B intrebħet minn Bormla għat-tielet darba konsekuttiva u għal total ta’ 18-il darba meta filwaqt li huma rebħu l-aħħar tiġrija, il-Kalkara, li dehru li se joħorġu rebbieħa, ma kklassifikawx minħabba li kellhom inċident mad-dgħajsa tal- Birgu.
Għaldaqstant, il-Bormliżi jimmiraw li jilħqu r-rekord tagħhom stess ta’ erba’ suċċessi konsekuttivi li kienu rreġistraw bejn l-2016 u l-2019.
Peró, ir-rekord assolut huwa dak ta’ ħames rebħiet nfila li huma stess kienu waqqfu bejn l-1996 u l-2000.
Bħas-soltu tmien timijiet se jieħdu sehem f’din ir-regatta li jinkludu lil Birżebbuġa, Bormla, Isla, Birgu, Marsamxett, Marsa, Kalkara u Siggiewi, b’dawn tal-aħħar tkun ir-raba’ darba ta’ parteċipazzjoni.
F’kull kategorija jkun hemm ħames tiġrijiet – (1) Dgħajjes tal-Midalji; (2) Frejgatini; (3) Tal-Pass ta’ Bi Tnejn; (4) Kajjikki; (5) Tal-Pass ta’ b’Erbgħa.
Ir-Regatta tiftaħ bit-tiġrija tal-frejgatini tan-nisa fejn mistennija tkompli d-dominanza taż-żewġ qaddiefa Shazel Grima u Glynis Mizzi li bħala tmunier se jerġgħu jkollhom lil Dale Scicluna.
L-ewwel tiġrija tibda fis-1.00 pm.