Wara li sar magħruf il-kwadru kollu tal-Aħħar 16 tal- UEFA Champions League wara li nhar it-Tlieta u l-Erbgħa ntlagħbu t-tieni legs tal-play-offs, illum f’12.00 pm, f’Nyon l-Isvizzera, jittellgħu l-poloz ta’ dan ir-round kif ukoll tal-kwarti-finali u tas-semi-finali. Il-finali se tintlagħab fl-Allianz Arena, fi Munich, nhar il-31 ta’ Mejju li ġej.
Intant, wara li l-holders Real Madrid eliminaw lil Manchester City, huma se jiffaċċjaw avversarji mill-aktar diffiċli hekk kif il-polza se tlaqqagħhom ma’ Bayern Leverkusen jew inkella dawk tal-istess belt, Atletico Madrid.
It-timijiet li spiċċaw fl-ewwel tmien postijiet fil-Fażi tal-Kampjonat se jkunu seeded u se jilagħbu l-ewwel leg barra minn darhom.
Dawn huma Liverpool, Barcelona, Arsenal, Inter, Atletico Madrid, Bayer Leverkusen, Lille u Aston Villa.
Għaldaqstant, dawk it-tmien timijiet li kkwalifikaw mill-play-offs illum se jkunu jafu d-destin tagħhom. Se jkun hemm tmien pots li f’kull wieħed se jkun hemm żewġ timijiet differenti biex ikunu magħrufa l-avversarji.
Il-poloz se jkunu hekk:
– (1) Paris St-German v Liverpool jew Barcelona
– (2) Club Brugge v Lille jew Aston Villa
– (3) Real Madrid v Atletico Madrid jew Bayer Leverkusen
– (4) PSV Eindhoven v Arsenal v Inter
– (5) Benfica v Barcelona jew Liverpool
– (6) Borussia Dortmund v Aston Villa jew Lille
– (7) Bayern Munich v Bayer Leverkusen jew Atletico Madrid
– (8) Feyenoord v Inter jew Arsenal
Imbagħad il-kwarti-finali se jintlagħbu hekk:
– Ir-rebbieħa bejn 1 u 2 (A); 3 u 4 (B); 5 u 6 (C); 7 u 8 (D)
Is-semi-finali se jintlagħbu hekk:
– Ir-rebbieħa bejn A u B; C u D
Ir-round tal-Aħħar 16 jintlagħab bejn l-4/5 u l-11/12 ta’ Marzu.
Il-kwarti-finali jintlagħbu bejn it-8/9 u l-15/16 ta’ April filwaqt li s-semi-finali jintlagħbu bejn id-29/30 ta’ April u fis-6/7 ta’ Mejju.
